Por Europa Press / Redacción | SANTIAGO DE COMPOSTELA | 23/08/2024 | Actualizada ás 19:41
A Consellería de Medio Rural informou de que o incendio forestal rexistrado no concello ourensán da Gudiña foi estabilizado este sábado. O lume, orixinado na parroquia de Pentes, deuse por estabilizado ás 00.43 horas e afectou a unhas 70 hectáreas.
Para a súa extinción, mobilizáronse a cinco técnicos, 12 axentes, 25 brigadas, 20 motobombas, dúas pas, sete avións e nove helicópteros. Entre as brigadas mobilizadas, participaron tamén dous equipos de bombeiros de Estonia, que se atopan de estancia en Galicia no marco do mecanismo europeo de protección civil.
Esta semana xa colaboraron na extinción do lume que afectou o concello, tamén ourensán, de San Cibrao das Viñas. Pola súa banda, o 112 Galicia informou de que a circulación pola N-525 quedaba restablecida en ambos os sentidos esta madrugada. A vía foi cortada ao tráfico este xoves pola noite para "garantir as condicións de seguridade".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.