Arrinca este venres a operación retorno de verán, con máis de 600.000 de desprazamentos en Galicia

A Dirección Xeral de Tráfico (DXT) prevé un total de 4.760.000 movementos de longo percorrido durante a operación retorno do verán, que comezará este venres ás 15 horas e se estenderá ata a medianoite do domingo, 1 de setembro. En Galicia, estima que se producirán 631.000 desprazamentos, o que representa o 78% do total previsto para o noroeste de España. As provincias de Lugo, Ourense, A Coruña e Pontevedra verán un incremento de vehículos con cifras que varían entre os 97.000 e os 227.000 desprazamentos.

O tráfico intensificaráse durante o fin de semana, principalmente o domingo e os días previos, coa simultaneidade dos movementos de retorno desde as zonas turísticas de costa e descanso e os desprazamentos pola entrada do mes vacacional de setembro. A previsión inclúe tamén unha notable afluencia de vehículos nos principais eixos e pasos fronteirizos debido ao retorno a países europeos de residencia habitual.

Desde as primeiras horas da tarde do venres 30 e ata a noite, a DXT anticipa intensidades elevadas e problemas de circulación tanto en sentido de saída dos grandes núcleos urbanos como nas principais vías de comunicación. O sábado 31, a intensidade continuará alta, especialmente entre as 9 e as 13 horas, co tráfico asociado ao inicio do mes de setembro e aos traxectos curtos de fin de semana. Pola tarde, comezará o retorno "graduado" dos que remataron as vacacións, provocando tamén problemas de circulación.

O domingo 1 de setembro, os accesos a praias e zonas de costa serán particularmente conflictivos pola mañá, e o tráfico intensificaráse entre as 16 e as 23 horas co retorno dos vacacionistas. Ademais, haberá intensidades elevadas nas rutas con pasos fronteirizos. A DXT recomenda prudencia, planificar as viaxes e consultar a información actualizada sobre o estado do tráfico a través da súa páxina web e o teléfono informativo 011. Para xestionar o fluxo de tráfico, estableceranse medidas como carrís reversibles, restricións á circulación de camións e paralización de obras.