Traballadores Autónomos a favor da turismofobia: "Non se pode matar á galiña dos ovos de ouro"
"Coidado cando se acenden lumes que son difíciles de apagar", di o presidente da UPTA.
Por Europa Press / Redacción | SANTIAGO DE COMPOSTELA | 04/09/2024 | Actualizada ás 13:40
O presidente da Unión de Profesionais e Traballadores Autónomos (UPTA), Eduardo Abad, censurou o recente auxe da 'turismofobia', un fenómeno que, dixo, repercute negativamente na economía. "Non se pode matar á galiña dos ovos de ouro", afirmou.
Así se expresou este mércores na rolda de prensa que concedeu xunto ao conselleiro de Emprego, José González, en Santiago para abordar a situación do sector e presentar o programa 'Emprende. Intégrate'. Abad advertiu de que, no caso de Galicia, a turismofobia pode levar ao peche de miles de establecementos hostaleiros. "Hai que ter moito coidado (...). Temos que ser conscientes de que non podemos matar á galiña dos ovos de ouro", insistiu.
O presidente da asociación de autónomos lembrou que o turismo é unha das "principais fontes de riqueza" de Galicia. "Non comprendemos que se poida estar a instalar a turismofobia cando Galicia é un auténtico reclamo", remarcou, sinalando que este foi un ano "de marca" en Galicia. Así mesmo, pediu aos concellos que "non miren cara a outro lado". "Temos un problema co prezo da vivenda, coa vivenda turística. Os concellos teñen que tomar decisións importantes. Os traballadores non poden estar a destinar un 60% dos seus recursos ao aluguer", sinalou. "Coidado cando se acenden lumes que son difíciles de apagar", concluíu.
