Traballadores de centros de Política Social piden saber o número de alumnos de cada escola infantil
Solicitan unha reunión coa conselleira, Fabiola García, antes do 16 de setembro, para abordar a "problemática" nas escolas
Por E.P. | SANTIAGO DE COMPOSTELA | 04/09/2024 | Actualizada ás 14:41
O persoal do Comité Intercentros de Política Social esixiron saber o número de alumnos por escola e franxa horaria xa que é a "única forma" de saber "se se cumpren ou non os cocientes". Nunha rolda de prensa celebrada este mércores diante de San Caetano, o presidente do Comité Intercentros da CIG, Manuel Gallardo Canitrot, detallou que solicitaron unha reunión coa conselleria para abordar, antes do 16 de setembro, a "problemática das escolas".
Neste sentido, explicou que, co curso a piques de empezar e coa negociación de horarios, demandaron que se lle dese o número de usuarios que ía haber en cada franxa horaria e en cada escola infantil. Algo ao que a Xunta negouse " completamente".
"Isto é incomprensible porque é un dato que teñen que darnos e esiximos que o fagan de forma inmediata", esgrimiu Manuel Gallardo. Outro dos puntos, é que, co novo acordo de condicións de traballo de Política Social, "non existe" horario de programación, cando antes "contaban con dúas horas e media semanais" que "foron suprimidas" a partir de xaneiro deste ano. Neste sentido, lembrou que o ciclo de 0-3 anos é unha etapa educativa que "está regulada", na que hai que programar o desenvolvemento das aulas.
COCIÑA PROPIA E CONVENIO COLECTIVO
Tamén insistiron noutros ámbitos que lles parecen "fundamentais": a dotación de persoal de servizos xerais e a dotación de cociña propia en todas as escolas infantís. En referencia ás condicións laborais, esixiron que "se respecten os dereitos" contemplados no V Convenio Colectivo para persoal da Xunta.
Cren que estes puntos deben tratarse "xa" e, por iso, remitiron un escrito á Consellería de Política Social e Igualdade solicitando unha reunión antes do 16 de setembro.
