A poboación estranxeira e migrante evita que Galicia entre en recesión demográfica
O país galego gaña 5.489 habitantes no terceiro trimestre, deles, 5.361 son estranxeiros.
Por Europa Press / Redacción | SANTIAGO DE COMPOSTELA | 07/11/2024 | Actualizada ás 12:20
A poboación de Galicia elévase a 2.712.132 persoas no terceiro trimestre de 2024, 5.489 habitantes máis (+0,20%) que o anteriores tres meses, segundo os datos provisionais que publica o Instituto Nacional de Estatística (INE).
A alza poboacional no terceiro trimestre en Galicia débese case na súa totalidade á chegada de poboación estranxeira, pois supoñen 5.361 persoas das 5.489 de aumento (as outras 128 son españolas).
Así, a poboación estranxeira ascende a 166.659, o que se traduce en 16.145 máis que no terceiro trimestre de 2023. Os habitantes de nacionalidade española son 2.553.645, 8.172 máis que un ano antes.
Este incremento intertrimestral do 0,20% de Galicia é inferior ao 0,28% da media española, que se aproxima aos 49 millóns (48.946.035). Na comparativa co terceiro trimestre de 2023, o aumento é de case 8.000 persoas. No terceiro trimestre de 2024, a poboación creceu en todas as comunidades e nas cidades autónomas de Ceuta e Melilla, e os maiores incrementos déronse en Comunidade Valenciana (0,54%), Madrid (0,46%) e Cataluña (0,39%).
Do total de 2,7 millóns de habitantes de Galicia, 1.406.710 son mulleres, o que supón unhas 100.000 máis que os 1.305.422 homes existentes. Hai 1.777 persoas centenarias en Galicia (con 100 ou máis anos) a 1 de outubro de 2024.
