A Xunta cifra nun 90 % os AVE que sofren atrasos: "O Goberno debe dar explicacións"

O conselleiro de Presidencia, Xustiza e Deportes, Diego Calvo, cifrou nun 90 % o volume dos trens de alta velocidade que sofren atrasos e cre que, tras varias incidencias, o Goberno central "debe dar explicacións". Así o declarou nunha entrevista na Cadena Ser recollida por Europa Press na que indicou que están "a ter bastante paciencia", pero esa paciencia, "loxicamente", pode esgotarse.

"Creo que estamos a ter bastante paciencia con esta situación e creo, sinceiramente, que deberían darse explicacións e dicirnos como van tentar solucionar o problema", esgrimiu Diego Calvo. Neste sentido, criticou que o único tren de alta velocidade que chegou ben de tempo foi o da viaxe inaugural e, a partir de aí, un "90 % dos trens teñen atrasos". Todos entendemos, continuou, que algún día un tren poida ter un atraso, pero "non é normal" que teñan un "90 % das expedicións" e, cando iso se repite varias veces, é "necesario dar explicacións" e dicir a que se debe iso.

O conselleiro, cuestionado sobre se falou co ministro de Transportes, Óscar Puente, nas últimas semanas indicou que "non" e explicou que, tras a reunión co secretario de Estado, enviou dúas cartas para solicitar unha xunta ou un contacto de Adif ou Renfe para "poder ter información e trasladar todas as queixas". Neste sentido, afirmou que cre que unha reunión con calquera ministro "é sempre positiva". "Sentar nunha mesa e coñecer o punto de vista do que ten en fronte sempre é positivo", asegurou Diego Calvo.

COMISIÓN DE INVESTIGACIÓN DE EULEN

Por outra banda, sobre a comisión de investigación que a oposición pide no Parlamento de Galicia polo contrato asinados a Xunta con Eulen, Diego Calvo afirmou que é unha "vía de escape" dos socialistas. "A única vía de escape que atopou o PSOE é volver sobre asuntos nos que temos demostrado que non existe absolutamente nada, nos que se teñen dado explicacións e o PSdeG seguindo instrucións volve tentar quitar estes asuntos", recalou Calvo.

TRANSPORTE ESCOLAR

O conselleiro tamén foi cuestionado sobre o transporte escolar e indicou que é consciente de que haberá incidencias. "Este ano non será unha excepción e haberá problemas", apuntou. Todo iso, explicou, porque cada ano cambian as matrículas e deben de axustarse as liñas de autobuses (tanto as propias como as integradas) e "tentarán dar a mellor solución posible".

O conselleiro de Presidencia, Xustiza e Deportes, Diego Calvo, en rolda de prensa tras o Consello da Xunta | Fonte: XUNTA