Davide Salvado. Lobo esencial
Davide Salvado é um esencial, é dizer mais alá das modificaçons que xurdem por evoluir, a sua eséncia mantem-se intata. Refiro-me ao que é, como dizia Antoine de Saint-Exupéry, esencial por invisível aos olhos.
Por Cobrantas - Ugia Pedreira | Galiza | 22/12/2015
Imaxe do disco 'Lobos' de Davide Salvado
Desde muito jovem comezou a interesar-se pola música tradicional galega e a mama-la de perto, ao pé duma erva aromática com a mesma arte de quem carda o linho ou fai um guiso lento. Deu os seus passos pouco a pouco sem perder de vista as aldeias de Ponte Vedra, sem presas em grandes objectivos presuntuosos, com a sua idiosincrásia, com as suas gentes, acarinhando animais. Desde elas e para quem queira ouvi-lo com a percusom e com o canto, leva-as por outros mundos. Eu sinto-me muito orgulhosa da sua existéncia mágica, porque quedou-me marcada a sua forma de escoitar a música nas minhas aulas, a capacidade de absorçom e o atrevimento escénico envolto em patio de jogos para rir e desfrutar de estar vivos. Aqui nesta pequena entrevista a rotundidade presente do Lobo Davide, que fai manada, que vive como canta.
Prazer fazer-te esta entrevista Davide! Vim-te chegar ao Conservatório Folque de Lalím mais ou menos com 17 anos, nom me lembro da idade, levavas um chaleque de coiro e umas zamancas. Com tempo as zamancas jà tenhem neoreformaçom e com a visom longana de ti, mas dentro a visom próxima parez que ainda tá presente o Davide “nenoflor” como te chamava. Lembras? Quem gosta da natureza, das coissas feitas a mam, do prazer do ar....ando trabucada ou ando demasiado para atrás?
Sí, sigo sendo o ''nenoflor'' que coñeciches naquel tempo. Agora, con máis coñecemento e consciencia.
Como admiradora da composiçom tenha ou nom autoria conhecida, som polo tanto admiradora da música tradicional deste pais. Canzons que forom assimiladas e guardadas entre a erosom das pedras polas gentes de cidade e aldeia. É o teu repertório fundamentalmente este? Cançons que vas aprendendo concretamente da tua zona de vida? Muitas levam contigo anos de companhia.
A música tradicional é na que máis cómodo me sinto.
Porqué te chama tam poderosamente atenzom a terra da aldeia? Qué atopas ali, tu como tantos nenos-as criados entre edifícios em vilas e cidades atraidos polo folclore material e inmaterial, como aconteceu com coros de cidade, agrupaçons, e tantas figuras e personagens da nossa cultura cautivados.
Chámame a atención a vida da aldeia porque aínda que nacín na cidade de Ponte Vedra tiven dende cativo conexión con ela. É onde mellor me sinto.
Arnica Pura e Lobos som os teus dous discos. Nos dous fai-se referéncia ás mulheres guardadoras de sabiduria no cantar, “nada novo na conversaçom”. E os homes? Onde tam, onde vam? Com elas diante, por detrás ao lado.... contigo...
As mulleres son ás que, segundo o meu parecer, mantedes viva a tradición neste país; por suposto tamén hai moitos homes, eu son un deles. Mais é de respeito falar en feminino se a maioría sodes vós.
Eliseo Parra produciu o terceiro e último disco de Chouteira no ano 2000. Eliseo produceu o teu primeiro disco com um som ibérico e polo que escoitei ponhendo muita delicadeza no teu cantar. Agora é o amigo Pedro Pascual quem te produce, Pedro leva uns anos 'de moda' no folque galego como produtor. Os dous com paisagem ibérica. Porque gostaches das formas de estos dous “ibéricos”, um que se foi achegando á musica galega por que foi cadrando assim e outro que nasceu entre raizes sonoras da Canhiza.
Eu coñecín a Eliseo Parra con aquel ''Tribus Hispanas'' grazas a ti. Nese intre souben que o meu primeiro disco tería que ser con el, e afortunadamente, así foi. É un traballo do que me sinto moi orgulloso.
Con Pedro foi doutro xeito; únenos unha amizade máis alá de que estexa de moda ou non. A maiores gústame moitísimo o seu traballo e tamén, concretamente, a súa sabiduría con respecto ao canto tradicional galego. Naceu rodeado de mulleres informantes e soubo entendelo.
Podes explicar-nos por favor porque se chama Lobos, e porque a portada do disco é branca ou porque a gente crês que te considera contemporáneo (no sentido literal é o que se produce na nossa época, no presente actual) ou porque o videclipe é tam singelo e repetitivo? Qual é o leitmotiv que une todo isto? Se o há. Ou nom. Ou pim pam pum.
O disco chámase Lobos por respeito ao meu país, e tamén por crítica. Os lobos son esenciais no monte, e a música tradicional nas vilas e aldeias. A desprotección, en ambos casos, é total. O disco é branco, porque me gusta o branco.
O porqué a xente me considera contemporáneo, poderacho explicar a propia xente; eu non podo explicarcho. A arte contemporánea está exposta a tóda-las interpretacións. Que cada un se deixe levar... e pim pam pum
O videoclipe fala da miña visión sobre a música popular. Penso que ela atópase nun lugar de pouco privilexio, incómodo, estreito, frío, malo de manterse nel; ao mesmo tempo, gústame estar nel xa que é un lugar elexido. A todo isto, o videoclipe tamén fala de soidade. De soidade acompañada, da soidade á que estou afeito a estar. A imaxe defende todo isto do que estou a falar.
Segues dando aulas de pandereta e canto tradicional? Qué ensinas, qué há de diferente em recever aulas contigo? Se há. Ou nom. Ou plis plas plus.
Non. Só dou algún curso monográfico e ensino a miña técnica aplicada ao instrumento, e a miña visión da nosa música.
Cómo vês a conjunzom canto-pandeireta-baile para a formaçom das novas geraçons? É uma triada para ir da mao, cómo vês em geral a docéncia? Jà levas anos e dado muito energia neste rego. Visto muitas pessoas, escoitado muitos timbres. Qué nos podes contar disto?
Penso que tería que haber máis escolas nas que se trate a nosa música e baile tradicional dun xeito libre e deixarse de tanto grupo folclórico que, ao meu parecer, só fan representar escenas románticas do que os directores/as dos mesmos pensan que nalgún momento foi. Algo que me molesta profundamente é ver a mulleres vestidas de burguesas do S. XIX tocando a pandeireta, cando este era un instrumento de pobres. A este tipo de atuendo, vaille máis o piano e unha mucama servíndolle o té.
Uma vez aberta a porta de Vic, do Womex, de outros festivais de “certa releváncia” vam por eles passando diferentes músicos da Galiza. A parte de ser experiéncias curriculares de vida artística e que apuxam á agenda, á autoestima, e também a viver lindas experiéncias ...qué te aportou a ti esse nomeamento?
Aportoume un recoñecemento como músico e como persoa. Tamén, a posibilidade de que me coñezan programadoras de todo o mundo.
Qual seria para despedir-te um bom desejo de amor e de humor para a música galega neste proximo futuro, presente, corrente. E namais, muitas “gracelas” como dis tu.
O meu desexo é que a música tradicional se faga, dunha vez toda en galego e que tóda-las músicas galegas ao vivo, poidan mostrarse en tóda-las cidades, vilas e aldeias da Galiza.
Salvado na entrada do Womex 2014 / Foto: Xaime Cortizo www.xaimecortizo.com
Ugia Pedreira - Cobrantas
Com oito álbuns lançados, a cantora de Marful e ex-diretora do Centro Galego de Música Popular, aCentral Folque, cria este espaço para as cobrantas musicais feitas á mao, é dizer, pessoas e projectos musicais que ao meu entender sejam de alto risco, medulares, lumínicos, vertebrais, que prestem atenção á canteira e a deixar sementes prantadas arredor da música galega feita em qualquer parte do mundo. Em Cobrantas intentara-se chegar ao para qué e porque dos discos, livros, tendas, pub, músico, editoral ou ideia a desenvolver na atualidade.
Máis artigos de Ugia Pedreira aquí.
Com oito álbuns lançados, a cantora de Marful e diretora do Centro Galego de Música Popular, aCentral Folque, cria este espaço “para as cobrantas musicais feitas á mao, é dizer, pessoas e projectos musicais que ao meu entender sejam de alto risco, medulares, lumínicos, vertebrais, que prestem atenção á canteira e a deixar sementes prantadas arredor da música galega feita em qualquer parte do mundo. Em Cobrantas intentara-se chegar ao para qué e porque dos discos, livros, tendas, pub, músico, editoral ou ideia a desenvolver na atualidade”.
A Central Folque
