O PP pide ao Goberno que inicie as obras da intermodal de Ourense e licite as da variante exterior

Parlamentarios estatais e autonómicos do Partido Popular, así como concelleiros da formación en Ourense, compareceron ante a estación intermodal para esixir ao Goberno o inicio das obras da mesma e a licitación das actuacións pendentes na variante exterior. "É preocupante que existan demoras tendo en conta o enorme prazo de duración do contrato, seis anos e un mes, o que nos leva a pensar que no mellor dos supostos as obras, desde que comecen de forma efectiva, non estarían finalizadas ata 2031. Un prazo moi elevado para o que hai que acometer", denunciou o deputado no Congreso Celso Delgado, quen afeou que Ourense foi a primeira cidade galega en recibir a alta velocidade, en decembro de 2021, "pero será a última en ter unha estación intermodal".

Neste sentido, criticou que en febreiro deste mesmo ano formalizaron entre Adif e a UTE adxudicataria o contrato de execución das obras, "e case sete meses despois non se aprecia signo aparente algún das mesmas, nin cartel, nin casetas, nin maquinarias, nin valados, nada". Tamén demandaron a licitación dos tramos pendentes da variante exterior de Ourense, lembrando que están en construción dous: o de Taboadela-Túnel de Rante, con 5,6 km de extensión, e o Túnel de Rante con Seixalbo, 2,3 quilómetros. Pero a variante componse ademais doutros tres tramos "que aínda non foron licitados".

Lamentan que o pasado mes de novembro o delegado do Goberno en Galicia, Pedro Blanco, supervisou as obras dos dous primeiros e trasladou que os proxectos do resto atopábanse "en revisión para adaptalos ás normativas de seguridade e aos prezos actuais, e garantir as máximas garantías na contratación". "Esas declaracións foron absolutamente decepcionantes por concisas, superficiais e achegar serias dúbidas sobre a vontade do goberno de dar continuidade á variante exterior cara á estación", aseverou Delgado, quen tamén trasladou que o prego de cláusulas administrativas da licitación das obras da estación "non contempla a vía dobre de entrada dos tres tramos pendentes da variante exterior".

PNL DO PP SOBRE INFRAESTRUTURAS

Tamén lembrou que en febreiro deste ano quedou aprobada unha proposición non de lei do Grupo Popular, pola que se instaba ao goberno a tomar un conxunto de 8 medidas en materia de estradas e de 13 en materia ferroviaria, en todo o ámbito de Galicia. Entre os seus puntos xa se atopaba a execución da variante exterior. "Venceu o primeiro semestre e Adif AV non procedeu a licitar as obras do seu tres tramos, tan necesarios para dar continuidade á variante", insistiu Celso Delgado.

TRAMO FERROVIARIO A MONFORTE

Continuando coa situación ferroviaria, os representantes políticos do Partido Popular de Ourense tamén demandaron unha data de finalización do tramo Ourense-Monforte de Lemos que permitan recuperar a conexión con Valdeorras. Din temer que o 30 de setembro a liña non estea en condicións de retomar a circulación dos trens e os servizos ferroviarios "seguiranse facendo por estrada". Así mesmo, a parlamentaria autonómica Noelia Pérez solicitou solucións para evitar a saturación do aparcadoiro da actual estación intermodal e tamén a colocación dunha marquesiña que protexa das inclemencias meteorolóxicas a taxistas e usuarios.

Por último, a deputada no Congreso Ana Belén Vázquez aproveitou a comparecencia para esixir de novo a Adif "actuacións inmediatas" para pechar perimetralmente as naves da rúa Río Arnoia, que aseguran que levan meses "okupadas por persoas que crean situacións de gran inseguridade". "Pelexas, ruídos, entradas de coches e furgonetas, algún incendio e hai constancia de actividades delituosas", manifestou Vázquez, quen por todo iso solicitou persoal de seguridade privado para vixiar esa propiedade e recibir información sobre "actuacións legais que promovesen e vaian promover para desaloxar aos que ocupan a propiedade".

Inma Moreiras, Noelia Pérez, Celso Delgado, Ana Belén Vázquez e Pepe Araújo, do PP, ante a estación intermodal de Ourense | Fonte: PP