A Xunta cre que a UE pon "cordura" coa rebaixa de protección do lobo e urxe ao Goberno a facer o mesmo
A conselleira Vázquez argumenta que a inclusión do lobo na listaxe de especies protexidas non responde a criterios científicos.
Por E.P. | Santiago de Compostela | 26/09/2024 | Actualizada ás 14:42
A conselleira de Medio Ambiente e Cambio Climático, Ángeles Vázquez, congratulouse pola decisión da Unión Europea de rebaixar a protección do lobo, unha medida que contou co voto en contra de España e tamén de Irlanda. "Celebramos que poña cordura", sentenciou.
E é que, coincidindo cun acto en Arteixo, apoiou a decisión fronte ao "concepto erróneo" que, ao seu xuízo, mantén o Goberno central e que vinculou con motivos "ideolóxicos" pola inclusión deste animal na listaxe de especies en réxime de protección especial. "Non responde a criterios nin técnicos nin científicos", dixo ao rexeitar que se siga mantendo a postura de "máxima protección a esta especie".
Por iso, celebrou o acordo na Unión Europea aínda que advertiu que "nada" cambiará e que a Xunta "nada pode facer" "mentres non haxa unha nova lexislación" e lobo "siga" na listaxe de especies protexidas.
"Non é unha especie en perigo de extinción", aseverou a conselleira quen, por outra banda, demandou ao Goberno o abono de "14 millóns de euros que lle debe a Galicia e aos gandeiros para facer fronte a ese desaguisado, a esas matanzas múltiples", asegurou en alusión aos lobos e os seus danos en gando.
