Axudas para apoiar iniciativas vinculadas ao tratamento de residuos téxtiles en Galicia

A Xunta concedeu nos últimos anos 3,5 millóns de euros en axudas para apoiar iniciativas e proxectos promovidos en Galicia por empresas, autónomos, asociacións e fundacións sen ánimo de lucro relacionadas coa xestión e recuperación de residuos téxtiles recollidos de forma separada.

Así o explicou a conselleira de Medio Ambiente e Cambio Climático, Ángeles Vázquez, durante a súa visita á planta que ten no municipio coruñés de Arteixo a empresa Insertega (Iniciativa Social Emprendedora da Reciclaxe Téxtil en Galicia).

A mesma dedícase ao tratamento deste tipo de residuos, ademais de apostar polo I+D+i nos seus procesos produtivos, aspectos que se abordaron na visita na que a conselleira estivo acompañada pola delegada territorial da Xunta na Coruña, Belén do Campo, e a directora xeral de Calidade Ambiental e Sostibilidade, María José Echevarría.

Nela, a conselleira puxo a esta firma como exemplo do "potencial" do sector desde o punto de vista da creación de emprego verde, de calidade e inclusivo.

A conselleira de Medio Ambiente e Cambio Climático, Ángeles Vázquez, visita a empresa Insertega. MONCHO FONTES | Fonte: Europa Press