Viticultores denuncian falta de axudas ao sector no retiro de Rueda
Por E.P. | SANTIAGO DE COMPOSTELA | 29/09/2024 | Actualizada ás 18:26
Viticultores da denominación de orixe Ribeira Sacra concentráronse este domingo fronte ao Hotel Pazo de Sober, onde o presidente da Xunta, Alfonso Rueda, reuniu durante este fin de semana ao seu equipo de goberno, para denunciar que a administración autonómica "non activou ningunha medida de apoio directo" ao sector nin tampouco "se aprecia horizonte de traballo que protexa a produción" de vendima o próximo ano.
Ademais, segundo destacou o Sindicato Labrego Galego (SLG) nunha nota de prensa, tamén rexistraron unha carta dirixida ao propio Rueda instándoo a convocar unha mesa de traballo "real", con presenza de todos os axentes do sector para empezar a "establecer pautas para protexer" esta denominación de orixe.
Entre elas, o sindicato lembrou algunhas como a poda en verde e baixar rendementos, prever axudas directas para o ano 2025, limitar plantacións, unha campaña de promoción diferenciando a DO Ribeira Sacra e un mapa que permita coñecer os límites da denominación de orixe.
Neste contexto, o Sindicato Labrego Galego convocou unha reunión aberta este luns, ás 19.00 horas, no salón de actos do edificio sindical de Monforte de Lemos para abordar cos viticultores da Ribeira Sacra estratexias a seguir para "soportar o forte impacto económico" que, asegurou, supón na comarca a non recollida da uva a máis de medio milleiro de produtores.
