A folga na CRTVG pasa a ser indefinida desde este mércores; estes son os servizos mínimos

A folga convocada polo Comité Intercentros da CRTVG pasará a converterse en indefinida a partir deste mércores 16 de outubro, tras varios días de parón alterno. Así o comunicou o comité cando convocou a folga, unha decisión que ratificaron este martes ante a ausencia de resposta por parte da compañía. O paro continuará realizándose como en xornadas anteriores: luns, mércores e venres entre as 11.30 e as 13.00 horas, durante a emisión de 'O Termómetro', programa que, aseguran, exemplifica a "externalización" e a "dilapidación de recursos públicos" que leva a cabo a CRTVG.

SERVIZOS MÍNIMOS

Este mesmo martes, o Diario Oficial de Galicia (DOG) publicou os servizos mínimos para o parón que, para o servizo de informativos, inclúe un documentalista; e tres informadores en San Marcos e un nas delegacións da Coruña, Lugo, Ourense e Vigo para a redacción de Radio Galega. Para a redacción de Televisión de Galicia, establécense, como mínimo, oito informadores en San Marcos e un nas delegacións da Coruña, Ourense, Vigo e Lugo. En canto a reporteiros gráficos, deberá haber seis nas instalacións de San Marcos e, unha vez máis, un por delegación.

Tamén se establece un informador a tempo real, un deseñador gráfico e un grafista-titulador; un maquillador, dúas persoas de produción; dous realizadores; catro axudantes de realización; un operador de posproducción ou un operador montador de vídeo; un operador montador de vídeo de inxesta PAM, un operador montador de vídeo de inxesta MAM e un operador montador de vídeo de media.

Respecto ao soporte e mantemento de emisións, solicítanse tres operadores de continuidade, unha persoa de emisións, dous operadores de soporte, dous técnicos de control, tres técnicos electrónicos de primeira ou técnicos electrónicos, un electricista, un axudante de mantemento, un almacenista e un analista programador ou técnico de sistemas.