30 anos do movemento Bravú, cando as guitarras chegaron ás aldeas
Xurxo Souto protagoniza unha road movie na que, o que foi líder dos Diplomáticos de Monte Alto, vai viaxando por Galicia e conversando con persoas protagonistas daquel movemento e con músicas actuais que valoran o que significou e a relación co presente e futuro cultural galego.
Por Galicia Confidencial | Chantada | 17/10/2024 | Actualizada ás 21:00
O movemento Bravú fai 30 anos. E, para conmemoralo presentarase BRAVÚ XXX, un filme documental realizado por Nós Televisión, no que Xurxo Souto invoca o mundo bravú trinta anos despois do nacemento deste movemento. Esta road trip musical na que participan emblemas da música galega, como María Xosé Silvar ou Nuno Pico, terá a súa estrea en Chantada, o vindeiro venres, 25 de outubro, ás 20.00 horas no Auditorio Municipal no que tamén haberá un coloquio con Xurxo Souto, líder dos Diplomáticos de Monte Alto, e Juan Camilo Gómez, máis coñecido como Richi, cofundador do festival Castañazo e integrante do grupo Os Rastreros, unha das bandas emblemáticas do bravú con base local en Chantada.
Non é casual que Chantada sexa o concello de estrea do filme documental que conmemora os trinta anos do movemento bravú. Os Rastreros xunto cos Diplomáticos de Monte Alto compartiron cartel na primeira edición do Castañazo Rock e, a partir de aí, xurdiu a idea de cuntarse todos os grupos de rock en galego que comezaban a agromar polo país.
As bandas son convocadas vía epistolar por Richi dos Rastreros e reúnense o 31 de outubro de 1994 na Taberna Caballero, na aldea de Viana, en Chantada. Alí crean unha etiqueta para si mesmos: o bravú. Por isto, este filme documental viaxa a través do país e do tempo para finalizar a súa viaxe na aldea de Viana en Chantada onde se produce un reencontro cheo de música, anécdotas, reflexións e afectividade.
LATEXO BRAVÚ
Antes desa apoteose da volta á Viana, Xurxo Souto encontrarase con persoas que nos axudarán a entender este movemento e saber se a día de hoxe hai un Bravú vivo na nosa historia cultural e musical. Despois de ver en directo en Pontevedra a gravación que o grupo musical Rager (Proxecto Xeración Sónica) fai dunha versión do mítico tema bravú ‘Estou na lavadora’; Xurxo Souto viaxa ata a Coruña para atoparse con Paola Beiro das Garotas da Ribeira, conectada co repentismo e a cultura popular mais tamén coa Barcelona mestiza que personificou o músico Manu Chao.
No seu camiño, Xurxo Souto atoparase tamén con Nuno Pico, de Grande Amore; con Xosé Manuel Pereiro, aliás Johnny Rotring en Radio Océano, con quen senta na barra da Buserana. María Xosé Silvar, Sés, agarda nun estudo da Casa do Rock para explicarlle a Xurxo Souto como influíu nela a referencialidade do movemento bravú; para despois continuar a viaxe na Sala Ártika de Vigo cos Vacalouras, quen conservan do Bravú ese descaro e reivindicación da aldea e dos barrios.
Con esta cosmovisión pangalaica, Xurxo Souto emprende á parada final de BRAVÚ XXX con Rafa Martínez do Caimán do Río Tea, Benxamin Queiro dos Impresentables de Vimianzo, Antón Díaz dos Papaqueixos e Richi dos Rastreros.
POR GALICIA ADIANTE
Despois da estrea do 25 de outubro en Chantada, o documental poderá verse en proxeccions que terán lugar ao longo de novembro en diferentes puntos do país para celebrar o trinta aniversario do bravú, e antes da súa difusión en aberto no mes de decembro no youtube de Nós Televisión, na plataforma de Movistar Plus+ para todo o Estado español e no 119 de R.
O documental foi realizado co apoio institucional do Concello de Chantada, do Concello de Pontevedra, da Deputación da Coruña, do Concello da Coruña, do Concello de Santiago e do Concello de Carballo.
