Atopan catro textos xacobeos inéditos anteriores ao Códice Calixtino
Por Europa Press / Redacción | SANTIAGO DE COMPOSTELA | 23/10/2024 | Actualizada ás 22:06
O profesor da Facultade de Filoloxía Joel Varela Rodríguez publicou en USC Editora o volume 'Máis aló do Códice Calixtino. Outros textos ao redor de Santiago o Maior ata o século XII', no que se recollen catro textos xacobeos inéditos anteriores á famosa guía medieval para as peregrinacións a Compostela.
No libro recóllense, ademais, textos ou fragmentos de textos xa coñecidos e moi relevantes para o coñecemento do culto xacobeo, desde as súas orixes máis antigas ata o ano 1200, algúns deles revisados. Os textos que recolle a obra preséntanse na súa versión orixinal, xunto coa súa correspondente tradución e comentario e completa o estudo unha ampla introdución literaria e histórica.
O profesor Varela recibiu para desenvolver este proxecto unha axuda da Cátedra Institucional do Camiño de Santiago e das Peregrinacións da Universidade de Santiago, grazas ao V Convocatoria de Axudas á Investigación sobre o Camiño de Santiago e as Peregrinacións-2023, froito da colaboración entre USC e Turismo de Galicia.
"Os textos inéditos máis reseñables son catro novas versións do relato da translación, a Translatio sancti Iacobi, todas elas probablemente da segunda metade do século XI e tamén probablemente escritas en Compostela, aínda que están conservadas só en manuscritos extrapeninsulares. Deles, os únicos que se atopan en acceso aberto son dous da biblioteca estatal de Múnic: son os códices Clm 2552 e Clm 3704", explica Joel Varela.
Outro texto relevante, segundo indica o investigador, é "a Concordia de Antealtares, que recolle a versión máis extensa do achado da tumba de Santiago". "Non estaba inédita, pero só existían transcricións das copias e non do documento máis antigo, que foi modelo das outras copias conservadas e que se conserva no Arquivo Histórico Universitario da USC", relatou.
