Produtores de uva alertan de "un antes e un despois" na Ribeira Sacra tras non recollerse 2 millóns de quilos

Unha campaña que deixa preto de dous millóns de uvas tintas sen recoller na Ribeira Sacra ameaza en converterse nun "antes e despois" para os viticultores da zona e a propia configuración desta paisaxe que aspira a converter en Patrimonio Mundial da Unesco.

En conversación con Europa Press, Ana Rodríguez, do Sindicato Labrego Galego (SLG), expón que "as uvas quedaron sen vendimiar", pero "de aquí a un pouco empeza a poda e, se non se poda, o ano que vén non hai produción".

E é que apuntan por parte do Sindicato Labrego que xa coñecen casos de pequenos viticultores que abandonaron a súa actividade por outra ao obter nesta campaña "só 18.000 euros cando contaban con 40.000". Alertan que tan só puideron sacar parte da produción a adegas "a prezos máis baixos que outros anos" e a un "moi baixo prezo" a particulares.

Neste sentido, advirte de que este é un "problema grave", pero "dá a impresión que se tenta dar a entender que non pasou nada". Reprocha que a Xunta fala de "axudas históricas" para a Ribeira Sacra, pero quéixase que aínda "non se convocaron" as relativas a conservación da paisaxe e "a estas alturas só hai unha destilación de crise duns 300.000 litros". Sobre subvencións da PAC, lamenta que "é unha cantidade ridícula por hectárea e aquí ninguén ten hectáreas".

As adegas da zona atópanse "en crise" e "por iso non compran a uva", coa previsión de que unha das máis importantes na comarca non compre na próxima campaña. "Se as uvas en bancales deixan de existir", avisa, "van cambiar moitas cousas na Ribeira Sacra", incluído a paisaxe, o que será "un antes e un despois". Esta veciña de Sabadelle, no municipio de Chantada (Lugo), insiste en pedir aos alcaldes da Ribeira Sacra que se mobilicen para demandar apoios á Consellería do Medio Rural.

MAZÁS E CASTAÑAS SEN RECOLLER

Pero na Ribeira Sacra tamén se atopan outros froitos por recoller este outono, como poidan ser mazás e castañas, neste caso por diferentes factores. A este respecto, obsérvase unha pequena rendibilidade por mazás de 23 céntimos en ecolóxico, con cuestións como falta de man de obra, pero tamén persoas maiores que antes vendían pequenas producións e agora deixan de facelo polos requisitos de documentación e rexistro nas explotacións da Xunta.

Martín Varela, xerente dunha cooperativa encargada da recollida de mazá en Chantada (Lugo), relata que realizan a súa campaña entre o 28 de setembro e 15 de novembro, para o que contan cun cinco operarios. Ademais, explica que lles ofreceron outras leiras --aínda que non poden abarcar máis-- porque "intermediarios este ano se xubilaron ou non atopan man de obra".

Acio de uvas nunha vide, a 1 de novembro de 2024, en Sober. A falta de man de obra para facer a recolección das mazás e as uvas na provincia de Lugo provocou que máis de 600.000 quilos de froita queden sen recoller.. Carlos Castro - Europa Press | Fonte: Europa Press