Condenado por abuso sexual a menor e 'sexting' un home que non entrará en prisión
Tras un pacto entre as partes personadas o acusado acepta dous anos, pero non entrará na cadea.
Por Europa Press / Redacción | SANTIAGO DE COMPOSTELA | 04/11/2024 | Actualizada ás 11:24
Un home recoñeceu cometer un delito de abuso sexual continuado a menor sen penetración e outro de 'sexting' -- envío ou intercambio de imaxes ou mensaxes de texto con contido sexual explícito -- en 2019 "no domicilio no que coincidían", e aceptou unha pena de dous anos de cárcere. O procesado non entrará en prisión tras un acordo entre as partes.
Así o manifestou o avogado da acusación particular en declaracións a Europa Press despois da intervención do acusado nun xuízo fixado para este luns na Audiencia Provincial da Coruña onde se acordou que fose a porta pechada para preservar o dereito á intimidade da vítima. Tras un pacto entre as partes personadas, o procesado recoñeceu os feitos e acordouse unha rebaixa da condena ao aplicarse as atenuantes de dilacións indebidas e reparación do dano por abonar 3.000 euros para indemnizar á vítima por danos morais.
Do mesmo xeito, estableceuse a prohibición de achegamento a distancia non inferior a 150 metros respecto da menor, "o seu domicilio ou lugar en que se atope", así como de comunicación. A sentenza foi declarada firme. O Ministerio Público pedía inicialmente para el seis anos de prisión por un delito continuado de abuso sexual continuado a menor sen penetración e outros dous anos polo de 'sexting'.
