Vítima de dous acusados de obrigar a mulleres a prostituírse: "Estaba encarcerada, non durmiamos e non comiamos"

Dous homes, de nacionalidade brasileira e casados desde fai dez anos, acusados de captar a mulleres procedentes do seu país para obrigalas a prostituírse negaron os feitos que se lles imputan e alegaron que a denuncia imposta por elas débese a que queren "obter a documentación para quedar en España legalmente".

Así o manifestaron durante o xuízo celebrado este xoves na Audiencia Provincial da Coruña. "Elas alugaban a habitación e facían o que querían dentro", sinalaron tras explicar que lles arrendaban un cuarto no piso no que vivía o matrimonio e afirmar que tiñan constancia de que exercían a prostitución no seu interior. Non entanto, os procesados negaron ofrecerlles traballo para vir a España, sufragar os gastos da viaxe ou prohibirlles saír libremente do piso, así como reclamarlles ningunha débeda durante a súa estancia no mesmo. "Nunca", dixeron, ademais, ao ser preguntados por se as vixiaban.

Na mesma liña, rexeitaron controlar dalgún modo tanto o prezo pactado cos clientes como o tempo que pasaban con eles. "De ningunha maneira", aseverou un dos procesados. Cuestionados polo motivo da denuncia destas tres mulleres, aseguraron que elas lles dixeron que "nunca ían a marcharse para Brasil e ían facer de todo para obter a documentación para quedar en España legalmente".

DÉBEDA

En contraposición, as vítimas relataron durante a vista que contactaron cos acusados a través dunha persoa en común e estes mandáronlles "as pasaxes" por whatsapp para viaxar a España. Acordaron, segundo testificaron, que era para traballar nunha barbaría como axudante, no coidado de maiores ou realizar labores de limpeza. A cambio, contraían unha débeda de entre 10.000 e 12.000 euros, un importe que "foron aumentando".

Unha vez en España, indicaron, obrigáronlles a prostituírse. "Non tiña outra opción, estaba encarcerada, coas xanelas pechadas todo o tempo, música super alta, non durmiamos e non comiamos", expuxo unha delas. Respecto ao exercicio da prostitución, que desempeñaban "24 horas sen ningún día de descanso", expuxeron que un dos procesados "concertaba todo cos clientes, o que ían facer e canto ían pagar". Ademais, concretaron que os acusados estaban "sempre de garda, un pola noite e outro pola mañá" e que as mulleres saían á rúa "só coa presenza deles".

MEDO POR AMEAZAS

"Aceptei porque non tiña opción, estaba ameazada, eles tiñan todo, a dirección dos meus pais, todos os datos da miña familia e fotos", lamentou para insistir en que "tiña medo". "Aínda estou con medo por iso tardei en denunciar, saben quen é a miña familia, saben onde estou, eu teño medo mesmo agora ", aseverou outra. "Van a por min", insistiu. No seu escrito, Fiscalía sostén que entre os anos 2021 e 2022 os dous, "actuando con intención de obter ilícito beneficio, desenvolveron unha actividade consistente en captar mulleres de orixe suramericana en situación de precariedade económica para exercer a prostitución en España".

A elas, na súa maioría de Brasil, dicíaselles inicialmente que viñan realizar labores de limpeza nunha barbaría propiedade dun dos acusados ou noutros lugares. O Ministerio Público cualifica os feitos como constitutivos de tres delitos de trata de seres humanos e outros tantos de prostitución, aos que suma os de inmigración clandestina, con penas que oscilan entre os tres e os sete anos de cárcere por cada un dos delitos que se lles imputan.

Exterior da Audiencia Provincial da Coruña | Fonte: Arquivo