Conclusións do Congreso Federal do PSOE: blindar na Constitución a subida de pensións, o matrimonio homosexual e o aborto

O PSOE aprobou incluír no seu ideario blindar na Constitución a revalorización das pensións, o dereito ao matrimonio homosexual e a interrupción voluntaria do embarazo, segundo indica o partido nun comunicado. O acordo chegou despois do traballo en comisión durante o 41 Congreso Federal que leva a cabo en Sevilla e ten o obxectivo de que estes dereitos estean blindados e non queden "ao albur da axenda regresiva duns poucos", indican os socialistas. "Por iso, incluiremos na Constitución a revalorización das pensións, o dereito ao matrimonio entre persoas do mesmo sexo, o dereito á interrupción voluntaria do embarazo, e a paridade de xénero como principio reitor nas institucións", indican.

Tamén aproban protexer ao mesmo nivel xurídico o acceso a sanidade pública universal e o dereito á educación. Deste xeito pretenden bloquear "calquera intento de privatización do Sistema Nacional de Saúde" e dos sistemas autonómicos. Por último, pretenden asegurar a titularidade pública "permanente" das vivendas de promoción pública e ademais introducirán na Constitución o dereito á seguridade climática e á auga potable, así como o dereito das xeracións futuras a herdar un planeta saudable e sustentable.