Soben un 1,7% as autoestradas dependentes da Xunta, tras actualizarse o IPC

O Consello da Xunta autorizou hoxe a addenda ao convenio coa concesionaria Autoestradas de Galicia para manter as bonificacións actuais das peaxes nas autoestradas A Coruña-Carballo (AG-55) e de Val Miñor (AG-57) e consolidar para 2025 as conxelacións na subida das peaxes de anos anteriores, actualizando conforme ao IPC.

Desta maneira, durante o próximo ano, as tarifas resultantes das peaxes na AG-55 e a AG-57 actualizrán as tarifas vixentes en 2024 segundo o 95% do IPC interanual de outubro 2023 a outubro deste ano. É dicir, o 1,7% a partir do 1 de xaneiro, manténdose, ademais, os descontos vixentes o próximo ano.

Esta medida ten como obxectivo, segundo a Xunta, beneficiar aos case 28.000 usuarios diarios destas dúas vías autonómicas. "Será unha subida do 1,7 por cento, o mínimo fixado no contrato", expuxo o presidente da Xunta, quen incidiu en que "en moitos tramos non haberá subida e onde se concentren en ningún caso será superior a cinco céntimos por traxecto".

Por outra banda, o Consello deu luz verde á resolución dos contratos de concesión das autovías do Salnés, de Barbanza, Ourense-Celanvoa e Santiago-Brión, operación coa que o Executivo galego materializa a eliminación das peaxes en sombra que viñan pagando anualmente nestas infraestruturas. Esta operación, que se valora nun importe de 299 millóns, suporá que a Xunta deixará de pagar, polo canon comprometido ata o final das concesións, un importe de 641,1 millóns, o que suporá un aforro para as contas autonómicas de 342,1 millóns.

AUTOVÍA A-57

O primeiro tramo da autovía A-57 entre Vilaboa e A Ermida (Marcón, Pontevedra) xa está en servizo despois de que este venres ás 11.00 horas se abrira ao tráfico este viario que comunica a autoestrada AP-9 cos polígonos industriais da Reigosa e O Campiño, en Pontevedra e Ponte Caldelas.

Á inauguración da que está chamada a ser circunvalación de Pontevedra, asistiron o delegado do Goberno en Galicia, Pedro Branco, e os alcaldes de Pontevedra, Vilaboa e Ponte Caldelas, Miguel Anxo Fernández Lores, César Poza e Andrés Díaz, respectivamente.

Este primeiro tramo da A-57 conta con 5,7 quilómetros de sección autovía e 2 quilómetros máis de acceso desde Figueirido, onde conectan a AP-9 e as estradas nacionais N-550 e N-554.