O BNG insta á Xunta a convocar "de inmediato" as axudas periódicas para vítimas de violencia machista
"É inadmisible que aínda que pasaron polo Consello da Xunta a finais de 2024, aínda non estean publicadas estas axudas, algo que habitualmente se fai o 2-3 de xaneiro", sinalou a deputada Noa Presas.
Por Europa Press / Redacción | SANTIAGO DE COMPOSTELA | 19/01/2025 | Actualizada ás 12:59
O BNG anunciou que presentará unha batería de iniciativas no Parlamento galego para instar á Xunta a "desbloquear de inmediato" a convocatoria de resolucións para a apertura de solicitudes de axudas periódicas para vítimas de violencia machista. Así o avanzou este domingo a deputada Noa Presas tras denunciar o "atraso" na publicación destas axudas para a prevención e o "tratamento integral" da violencia de xénero, unhas subvencións que cualificou de "importantísimo instrumento económico" para apoiar ás vítimas.
"É inadmisible que aínda que pasaron polo Consello da Xunta a finais de 2024, aínda non estean publicadas estas axudas, algo que habitualmente se fai o 2-3 de xaneiro", sinalou a coordinadora da área de Acción Feminista do BNG. Nesta liña, a deputada criticou a "inacción" do Goberno galego, ao que reclamou que "sala da súa desidia e da súa incompetencia" e ao que tamén lembrou que a finais de 2024 Galicia contaba con 5.801 casos activos no Sistema de Seguimento Integral nos casos de Violencia de Xénero (VioGén). Con todo, Presas incidiu na "urxencia" de que o Executivo de Rueda "desbloquee inmediatamente" a convocatoria destas prestacións e de que "teña a mesma présa en traballar que a que ten en seguir a axenda de retrocesos en materia de igualdade do PP no Estado".
