Melloras para a mobilidade veciñal en Allariz

O Concello de Allariz concluíu os traballos de mellora e pavimentación dunha senda peonil que conecta a estación depuradora de augas residuais (EDAR) coa zona do Seixo. A intervención supón manter o compromiso do goberno local coa mellora de infraestruturas que favorezan a mobilidade veciñal ao tempo que son respectuosas co medio ambiente.

A actuación consistiu na aplicación de sabrego compactado, un material natural e sostible que garante un pavimento firme e duradeiro, respectuoso coa contorna natural e esteticamente integrado na paisaxe con apariencia rústica dun carreiro. Esta senda, moi utilizada tanto por residentes como por visitantes, forma parte dos roteiros peonís que promoven a mobilidade sostible e para gozar da contorna natural de Allariz xa que une o núcleo urabno coa cidade deportiva do Seixo e a zona do camping. As obras completáronse coa colocación de varios bancos e papeleiras.

Desde o Concello destacaron que esta obra supuxo un investimento de 30.000 € e contou coa cofinanciación de Deputación Provincial de Ourense.