Denegada a residencia a un estranxeiro por ser unha "grave ameaza para a seguridade e a orde pública"
O TSXG destaca que ten antecedentes por violencia de xénero, lesións e coaccións.
Por Europa Press / Redacción | SANTIAGO DE COMPOSTELA | 11/02/2025 | Actualizada ás 12:30
A sección primeira da Sala do Contencioso-administrativo do Tribunal Superior de Xustiza de Galicia (TSXG) denegou a residencia temporal en Ourense a un cidadán estranxeiro con antecedentes por delitos de violencia de xénero, malos tratos familiares, lesións e coaccións, xa que considera que representa "unha grave ameaza para a seguridade e a orde pública".
O alto tribunal galego confirmou, desta forma, a sentenza emitida polo Xulgado do Contencioso-administrativo número 1 de Ourense na que desestimou o recurso interposto polo afectado contra a resolución da Subdelegación do Goberno en Ourense, de data 21 de xuño de 2023, na que rexeitou a concesión desta autorización, que o home presentara alegando "arraigamento".
Os maxistrados, en resposta a unha das alegacións do recorrente, explican no fallo que o antecedente penal por furto, derivado dunha condena de 2013, xa se tivo por cancelado. Con todo, engaden que no oficio do Rexistro de Penados figuran dous antecedentes penais máis: "un por un delito de inutilización ou omisión de dispositivos técnicos para o cumprimento de penas ou medidas, cometido en novembro de 2021, que se acha pendente de cumprimento, e outro por delitos de violencia doméstica e de xénero-lesiones e malos tratos familiares, en concreto, e por coaccións, cuxa condena se acha suspendida, polo que non é cancelable".
A Sala entende que o home "representa unha grave ameaza para a seguridade pública e a orde pública, coa comisión de delitos de gravidade que producen gran alarma social, máxime ao ser dúas mulleres distintas as vítimas, o que pon de manifesto a resistencia a acatar as normas mínimas de convivencia na sociedade, xerando, ademais, unha grave tensión familiar, pois unha das prexudicadas era a exmuller do recorrente".
VE UNHA "FALTA DE CONSIDERACIÓN" CARA ÁS NORMAS SOCIAIS
Así, resalta que "o seu comportamento delincuencial, mantido e reiterado ao longo do tempo ata a actualidade" --o primeiro fallo data de 2013 e o último é recente--, pon de manifesto "unha falta absoluta de consideración coa sociedade no ámbito humano, social, familiar e xurídico, impedindo apreciar calquera arraigamento na contorna familiar e social no que se desenvolve a súa vida".
"O apelante trata de restar importancia ás condenas que lle foron impostas, pero tal argumentación non pode ser acollida, posto que non só foi reiteradamente denunciado e condenado polo grave delito de malos tratos familiares, lesións e coaccións, senón que nas propias sentenzas houberon de acordarse as medidas de prohibición de aproximarse á vítima e de comunicarse con ela, que, tal e como informa a Unidade de Violencia de Xénero, mantéñense en vigor, debendo resaltarse que outra das condenas do demandante é por inutilización ou omisión de dispositivos técnicos para o cumprimento de penas ou medidas", sinala o TSXG.
