A Xunta insiste en que a xeración eléctrica renovable chegue ao 85% en 2030

Galicia aspira a reducir un 75% as emisións de dióxido de carbono (CO2) antes de 2030 e que a xeración eléctrica renovable chegue ao 85%, dentro do seu obxectivo de conseguir a neutralidade climática en 2040. Estes son algúns dos retos recolleitos no II Plan Rexional Integrado de Enerxía e Clima (PRIEC 2030) e que a conselleira de Medio Ambiente e Cambio Climático, Ángeles Vázquez, destacou durante a presentación deste instrumento para actuar fronte ao quecemento global.

Este segundo PRIEC pretende guiar de forma transversal as políticas galegas ao amparo da Estratexia Galega de Cambio Climático e dar continuidade ao desenvolvido entre 2019 e 2024, que permitiu que Galicia reducise a emisión de gases de efecto invernadoiro a un ritmo tres veces superior ao de España e da UE así como que sexa a comunidade na que máis se reduciron as emisións contaminantes (preto do 60%), por encima mesmo dos obxectivos europeos para 2030.

A responsable autonómica explicou que neste novo documento inclúense 93 medidas específicas coas que se prevé mobilizar un investimento de preto de 1.800 millóns de euros. A finalidade última é consolidar a "posición de privilexio" da comunidade autónoma na loita contra o cambio climático e reforzar cuestións como a capacidade de absorción de dióxido de carbono, un campo no que Galicia é responsable dunha de cada cinco toneladas capturadas no conxunto de España.

A conselleira incidiu en que este plan é "un paso máis" do Executivo galego na súa estratexia para "implicar a toda a sociedade na adaptación ao cambio climático e os seus efectos", na liña doutras actuacións como a creación da marca Galicia Refuxio Climático, a posta en marcha da iniciativa Xuventude polo Clima, a creación da Rede Local polo Clima ou a Alianza Galega polo Clima, esta última xa con máis de 190 entidades público-privadas adheridas.

Galicia aspira a reducir un 75% as emisións de CO2 antes de 2030 e que a xeración eléctrica renovable chegue ao 85%. MONCHO FONTES | Fonte: Europa Press