Pontevedra e Lugo tamén son provincias de Pedro Sánchez

O sector de afíns ao vencedor das primarias do PSOE, Pedro Sánchez, fíxose cos 16 postos de delegados que representarán aos socialistas da provincia de Pontevedra e cos 11 que o farán na provincia de Lugo no Congreso Federal do próximo mes de xuño.

Pedro Sánchez, candidato á Secretaría Xeral do PSOE

Gonzalo Caballero encabeza a lista de delegados do PSOE de Pontevedra, seguido por Maica Larriba e o alcalde de Vilagarcía, Alberto Varela, en terceiro lugar. Marta Freire de Moaña e o alcalde de Pontecaldelas, Andrés Díaz, completan os cinco primeiros postos. Pola súa banda, será o alcalde de Pedrafita do Cebreiro, José Luis Raposo Magdalena, quen lidera a lista dos socialistas lucenses no Congreso Federal do PSOE que terá lugar o próximo mes de xuño.

Finalmente, o sector que apoiou á presidenta da Xunta de Andalucía, Susana Díaz, nas primarias do pasado 21 de maio decidiu non presentar candidatura á delegación pontevedresa e a lucense logo de fracasar o intento de elaborar unha lista que reflectise o resultado das votacións na provincia das eleccións á Secretaría Xeral do PSOE.

Ruptura en Pontevedra

Segundo fontes consultadas por Europa Press, os afíns a Díaz, aliñados co alcalde vigués, Abel Caballero, decidiron retirar a súa proposta e non participar nas votacións. A elección de Gonzalo Caballero como cabeza de lista para a candidatura consensuada provocou que os 'susanistas' decidisen romper coas negociacións.

Deste xeito, a única lista presentada recibiu 116 votos a favor e 27 en branco. Completan a lista de 16 delegados de Pontevedra: Digna Lia Rodríguez, Nicolás González, Verónica Tourón, Eduardo Reguera, María Pérez Martínez, Jorge Luís María López, Rosa María Otero Carballo, Raimundo Calviño, Violeta Lois, José Vence e Juliana Dios Barreiro.

En declaracións a Europa Press, Gonzalo Caballero indicou que buscaron "a integración ata o último momento" pero "os que derrubaron a Pedro (Sánchez) anteriormente expuñan un veto" cara a súa persoa. "A nosa delegación considera que non se pode facer futuro con vetos", apostilou.

Así, chamou a estar "á altura das circunstancias", á vez que convidou a "os cargos públicos institucionais" do PSOE de Pontevedra a "entender" a "nova etapa" aberta no partido. "Fallan os que non entenden a mensaxe da militancia polo cambio", incidiu.

'Susanistas'

Pola súa banda, o portavoz do PSOE de Vigo, Carlos López Font, --afín a Susana Díaz-- manifestou, en declaracións a Europa Press, que a intención do sector 'susanista' foi que "houbese un acordo" para reflectir o resultado das primarias nunha lista de consenso.

Con todo, o acordo para elaborar esta lista conxunta non puido alcanzarse por, segundo López Font, as "intransixencias" dos 'pedristas', polo que decidiron apartarse e non presentar unha proposta propia coa intención de non xerar "división".

E é que, segundo López Font, "os que perderon en Vigo" non poden "ser referencia" a delegación dos socialistas da provincia no Congreso Federal, en alusión a Gonzalo Caballero, cuxa elección como cabeza de lista non foi aceptada polos partidarios de Susana Díaz.

No entanto, defendeu que "non era cuestión de nomes" e que este sector non vetou "a ningunha persoa". Por iso, continuou, a pesar dos "moitos intentos" e fronte a "a inflexibilidad total ata o último momento" dos 'pedristas', o sector máis próximo ao alcalde vigués decidiu apartarse do proceso de elección de delegados."Non queremos que haxa división e por iso saímos e non participamos nas votacións", declarou López Font.

Lugo

En Lugo, ademais do alcalde de Pedrafita do Cebreiro, os outros representantes da candidatura serán afíns a Pedro Sánchez. A lista foi referendada polo 73 por cento dos 123 delegados comarcais presentes este domingo no 'congresiño' do PSOE da provincia de Lugo.

Así, acompañan a Raposo Magdalena a alcaldesa de Guitiriz, Regina Polín --Terra Chá--; o portavoz do PSOE no Corgo, Javier Cerqueiro --Lugo--; María Carmen Veiga --A Mariña--; o deputado José Antonio Quiroga --Lemos--; Isabel Salazar --Lugo--; José Luís Díaz --Lugo--; Raquel López Rodríguez --Chantada--; o alcalde de Ribas de Sil, Miguel Ángel Sotuela --Quiroga--; Marina Ramudo Graña --Pol-- e Hugo Ucha --Lugo--.

Pedro Sánchez gaña en Galicia

Ademais de en Pontevedra e Galicia, tamén na Coruña e en Ourense gañou o sector de Pedro Sánchez.En Ourense, cunha votación moi igualada, os afíns a Sánchez fixéronse con cinco dos nove postos da lista ao acadar o 44% dos votos fronte ao 42 do sector "susanista", que encabeza o ex secretario xeral Pachi Vázquez, moi crítico cos que votaron por Pedro Sánchez.

A Coruña foi a única provincia onde se chegou a un acordo entre os tres sectores que tiveron votos nas primarias. Así, da lista de 20 delegados, haberá 14 afíns ao vencedor das primarias, Pedro Sánchez; catro alíñanse coa presidenta andaluza, Susana Díaz, e dous co exlendakari Patxi López.