A USC remite á Fiscalía o expediente aberto ao profesor Luciano Méndez polo seu apoio a 'La Manada'
A Universidade de Santiago de Compostela considera que as súas palabras poden constituír un delito.
- O profesor Luciano Méndez pide á USC que o expulse e di que "calar non vou calar"
- Estudantes da USC piden a "inhabilitación total" do profesor que defendeu a 'Manada'
- Aberto expediente ao profesor que colgou un vídeo defendendo a 'Manada'
Por E.P. | SANTIAGO DE COMPOSTELA | 21/06/2018 | Actualizada ás 15:38
A Universidade de Santiago de Compostela (USC) remitiu á Fiscalía o expediente relativo ao profesor Luciano Méndez Naya polas súas declaracións de apoio a 'La Manada', por se as súas palabras puidesen constituír un delito.
Esta decisión, que confirmou a institución, prodúcese logo de concluír o expediente aberto a este docente por mor de varios vídeos colgados en redes sociais nos que criticaba á vítima de 'La Manada' e mostraba o seu apoio aos condenados.
A pesar de que, xa no seu momento, a institución compostelá se desvinculou e criticou estas opinións, o expediente concluíu que a USC non pode levar a cabo ningunha medida contra Méndez Naya, dado que as opinións foron realizadas nun contexto privado e non vinculado á súa actividade docente.
No entanto, si remitiu todo o contido do expediente á Fiscalía para que sexa esta a que determine se Luciano Méndez ten algún tipo de responsabilidade delictuosa polas súas palabras.
As opinións, vertidas por este docente en redes sociais a través de varios vídeos, xeraron un forte malestar entre colectivos feministas e estudantís, que se manifestaron ante a USC para pedir a expulsión do profesor, que xa foi obxecto dun expediente anterior por un comportamento inadecuado cunha alumna.
