Yolanda Díaz será recibida polo monarca español
Felipe VI verá na tarde deste mércores á deputada de En Común- Unidas Podemos na rolda de consultas para a investidura. Tanto ERC como EH Bildu excluíronse da rolda de consultas.
Por E.P. | Madrid | 04/06/2019 | Actualizada ás 12:20
O Rei iniciará este mércores a rolda de consultas coas formacións parlamentarias con vistas á sesión de investidura e farao recibindo ás dez de mañá no Palacio da Zarzuela ao deputado do Partido Rexionalista de Cantabria (PRC), José María Mazón. Pola tarde, ás 17,15 horas, será a quenda da deputada galega de En Común-Unidas Podemos Yolanda Díaz.
Ao longo dos próximos días, Felipe VI escoitará a quince representantes políticos, de acordo coa listaxe que este luns lle entregou a presidenta do Congreso, Meritxell Batet, dando así o inicio ao proceso de investidura.
Conforme ao artigo 99.1 da Constitución, "despois de cada renovación do Congreso, o Rei, previa consulta cos representantes designados polos grupos políticos con representación parlamentaria, e a través do presidente do Congreso, proporá un candidato á Presidencia do Goberno".
Tras a comunicación de Batet, Zarzuela comezou a citar aos representantes dos partidos con presenza no Congreso, que desfilarán a partir deste mércores de menor a maior para comunicar ao Xefe do Estado cal sería a súa posición sobre unha ou outra posible candidatura á Presidencia do Goberno.
NIN ERC NIN BILDU
Tanto ERC como EH Bildu excluíronse da rolda de consultas. Os independentistas cataláns manteñen a súa negativa a participar en encontros co Xefe do Estado, unha ruptura que se agravou tras o referendo do 1-O e o discurso de Felipe VI de dous días despois. De feito, ERC xa se ausentou das roldas de consultas tras as eleccións xerais de decembro de 2015 e as de xuño de 2016; naquela ocasión xustificaban a súa actitude en que o Rei tampouco recibira á entón presidenta do Parlament, Carme Forcadell.
Tampouco EH Bildu se suma esta vez á rolda de consultas. En 2011, cando Amaiur sumou sete deputados, a coalición abertzale si se entrevistou co Rei Juan Carlos, pero nas roldas seguintes xa se ausentou e agora volverá facer o mesmo.
