Sobe o número de contaxiados nos centros de discapacidade tras un brote con 14 casos

Os casos activos de coronavirus en residencias de maiores de Galicia sitúanse este luns en 319, entre usuarios (233 afectados) e traballadores (86 casos), segundo os datos trasladados pola Consellería de Política Social. Soben, pola contra, nos centros de discapacidade tras detectarse un novo foco no centro Ricardo baró.

Así, a cifra de maiores contaxiados baixou de 236 a 233, tras o falecemento, nas últimas horas, de tres anciáns procedentes dos centros xeriátricos do Incio, DomusVi Lugo (Outeiro de Rei) e Os Gozos (Pereiro de Aguiar).

Segundo a información notificada por Política Social, a residencia DomusVi de Outeiro de Rei mantense como o principal foco de COVID, con 141 usuarios contaxiados; seguida pola residencia do Incio (59 maiores afectados); e a de Orpea en Culleredo (26 usuarios con coronavirus). A eles súmanse 5 casos entre os usuarios de DomusVi de Lalín, un caso en Castro Ribeiras do Lea, e outro na residencia de Arteixo.

Con respecto aos traballadores de centros xeriátricos, engadiuse un novo caso positivo ao cómputo global (o dun empregado de DomusVi en Outeiro de Rei), de modo que xa son 86 os traballadores afectados. O persoal con maior número de afectados é a do Incio (36 casos), seguida por DomusVi de Outeiro de Rei (23 casos).

CENTROS DE DISCAPACIDADE

Por outra banda, os casos de COVID en centros de discapacidade aumentaron de 17 a 31 (entre usuarios e traballadores), debido a que se sumaron 14 casos entre os usuarios da residencia Ricardo Baró de Aspronaga (Oleiros). Así, nesa residencia para persoas con discapacidade hai 26 usuarios afectados.

Con respecto aos traballadores destes centros, o número de casos mantense en 5: dous na residencia Ricardo Baró, un traballador de Aspace (A Coruña), outro da residencia Juan Vidán Torres (Santiago) e outro da Residencia A Braña (A Estrada).