Bos viños con identidade

A Adega Cachín elabora a marca “Peza do Rei”, que recentemente foi noticia por ser escollida polos organizadores dun banquete ao que acudíron o presidente Obama e personalidades da cultura e artes escénicas dos EE.UU. César Enríquez Diéguez que é o director da adega explicou así no libro “Palabras da Terra” a súa aposta pola lingua galega: “Utilizo a lingua galega porque son galego; porque penso e falo en galego; porque coido que todo consumidor debe saber a orixe dun viño e non hai mellor maneira de sabelo que falando a súa lingua, o das súas xentes e o da terra que o víu nacer. Desta maneira reforzase a súa personalidade e faise máis senlleiro”.

 

Alfredo Fernández Rodríguez é o xerente da Adega Pousadoiro que dá nome  a súa marca. Home de moitos saberes - veterinario e enólogo-, define así o seu viño: “Este viño é o resultado dun traballo ben feito, que combina a mellor tradición artesá no cultivo dos viñedos, a escolla manual da uva escollida na viña, cunha tecnoloxía cada vez máis moderna na adega e o asesoramento necesario para facer da materia prima un produto sutil en naris, equilibrado en boca e con arrecendos de froitas maduras con óso e recordos a froitas tropicais”.

 

Cachín e Pousadoiro son dúas adegas  que saben que a mellor maneira de prestixiar os seus viños é identificalos co noso idioma, reforzando así a súa orixe nos mercados foráneos onde se poden mercar, emulando ás moitas marcas de viños e licores fabricados noutras latitudes ben afastadas de nós que se venden en Galicia nos respectivos idiomas sen que esta circunstancia limite o número de consumidores, que os máis deles non son quen de leren as etiquetas.

 

Do sector agroalimentario, o vinícola vén sendo a vangarda na innovación tecnolóxica. Pero éo tamén na identificación das súas marcas co noso sinal de identidade. Xa son cento noventa e sete as adegas que etiquetan no noso idioma. Grazas a elas acadou prestixio e proxección nos mercados internacionais.

 

Aproveitamos esta breve louva para dirixir aos consumidores galegos a mensaxe do fomento do consumo responsable e solidario coas marcas que etiquetan en lingua galega. Deste xeito estamos a facer posible o mantemento dun sector produtivo que xera economía e fixa poboación no rural, ao tempo que contribúe a fomentar a lingua galega no ámbito económico no que aínda ten escasa presencia.

 

O próximo sábado, día 26, cando as campás da igrexa de Santo André dean as badaladas anunciando a oración do ”Angelus”, o pazo dos Ulloa recibiranos na súa adega onde en 1936 Álvaro das Casas constituira a Unión de Colleiteiros do Ribeiro do Avia.