Ferido un home de 86 anos tras un accidente de tráfico en Montederramo
Tivo que ser trasladado ao hospital xunto con outra condutora, de 45 anos.
Por E.P. | SANTIAGO DE COMPOSTELA | 16/09/2021 | Actualizada ás 14:05
Dúas persoas resultaron feridas nunha colisión entre dous vehículos ocorrida este xoves no concello de Montederramo, en Ourense, unha das cales necesitou ser excarcerada. Segundo informou o 112, sobre as 10,00 horas unha testemuña do accidente chamou ao servizo de emerxencias para solicitar asistencia médica e axuda para dúas persoas implicadas no sinistro ao indicar que estaban atrapadas no interior dos seus turismos.
O choque tivo lugar en Vilariño Frío, no punto quilométrico 33 da estrada comarcal OU-536. Os xestores do CIAE-112 Galicia mobilizaron aos membros do GES de Castro Caldelas, á Garda Civil de Tráfico e aos servizos sanitarios que, pola súa banda, comunicaron o desprazamento do helicóptero medicalizado con base en Ourense para o punto.
No lugar, o GES de Castro Caldelas indicoulle ao 112 que tiveron que excarcerar a unha persoa que non podía saír do vehículo que manexaba, ao quedar deformada a porta. Engadiron tamén que, finalmente, as dúas persoas feridas tiveron que ser trasladadas en ambulancia.
En concreto, informou o 061, ao lugar enviou un helicóptero medicalizado e dúas ambulancias para atender aos dous pacientes, un home de 86 anos, M.P.B., e unha muller de 45, A.P.A., que foron levados ao Complexo Hospitalario Universitario de Ourense (Chuo). Co fin de restablecer a seguridade na vía, tamén foi informado o persoal de mantemento da estrada.
