O BNG ve "galegófobo" o recurso de Hablamos Español contra a ordenanza lingüística na Coruña

O portavoz municipal do BNG no Concello da Coruña, Francisco Jorquera, vinculou con sectores "galegofóbicos" o recurso de Hablamos Español contra a ordenanza de usos lingüísticos do consistorio coruñés. Nun comunicado, a asociación informou que presentou este recurso ante o Tribunal Superior de Xustiza de Galicia (TSXG) por consideralo "un proxecto de enxeñaría social para cambiar a lingua das persoas".

Preguntado por esta cuestión, Jorquera manifestou que a ordenanza garante aos cidadáns "o dereito a ser atendidos en galego" e cualificou como unha "anomalía" que non existise na cidade unha ordenanza deste tipo. "Hai sectores retrogados, galegofóbicos, que tentan pór rodas", dixo sobre o posicionamento desta asociación e tras insistir en que o BNG está "orgulloso" desta ordenanza.

O portavoz municipal do BNG na Coruña, Francisco Jorquera, comparece en rolda de prensa xunto á portavoz nacional Ana Pontón. BNG | Fonte: Europa Press