Gandeiros bloquean a entrada da planta de Larsa e avisan de boicots a marcas se non pagan un prezo xusto polo leite
Unións Agrarias avisa tamén de protestas ante o Ministerio se non "cumpre cos seus deberes".
Por Europa Press / Redacción | Lugo | 16/11/2021 | Actualizada ás 16:05
Uns 400 gandeiros, convocados por Unións Agrarias, bloquearon a entrada e saída da planta de Larsa, no concello de Outeiro de Rei, para reclamar unha suba dos prezos que se pagan aos gandeiros polo leite.
Na protesta bloqueouse a vía de entrada á fábrica cunha barricada en chamas de pneumáticos, palla e cartóns. Así mesmo, portaron unha pancarta coa mensaxe "Polo noso traballo. Polos nosos produtos. Prezos xustos".
O secretario de Coordinación Sectorial e Área Externa de UU.AA., Felix Porto, avisou de que a situación que vive o sector verase "agravada" no caso de que "non se tomen decisións urxentes".
Así, remarca a "simboloxía especial" de Larsa, xa que o director xeral de Capsa Food (na que se enmarca Larsa) é o presidente da Federación Nacional de Industrias Lácteas (Fenil). Sinala que esta compañía recolle o 35% do leite que hai en Galicia, polo que "calquera decisión" que toma "ten repercusión no conxunto do sector".
Igualmente, Porto recrimina que hai uns días esta empresa "presumía de ter a conta de resultados máis avultada da súa historia, sendo consciente da sangría de perdas de explotación froito da caída de prezos e da subida de custos de produción".
Ademais, remarca que Larsa conta con "base cooperativa", polo que lle pide "xestos", á vez que demanda que "se cumpra a lei de cadea".
BOICOT A MARCAS
Unións Agrarias ameaza a industrias como Larsa ou Lactalis con comezar un "boicot público" das súas marcas se non hai melloras de prezos para os gandeiros.
Ademais, insta ao Ministerio de Agricultura a que fagan cumprir a lei de cadea alimentaria e incoe sancións, pois avisa de que convocarán mobilizacións ante o Ministerio se non "cumpre cos seus deberes".
A semana pasada a organización agraria xa protagonizou unha protesta igual contra Lactalis, en Vilalba. Unións Agrarias alerta de que os custos de produción disparáronse un 26% nos últimos meses, á vez que os produtores galegos seguen á cola en prezos --con 33,3 céntimos por litro--. Reclaman unha equiparación a outros países para alcanzar cifras de 38 céntimos.
