Os gandeiros piden "un rescate" á Xunta ante as perdas do sector da carne
"Temos un produto 'top' que estamos a regalar", lamentan dende UU.AA.
Por E.P. | SANTIAGO DE COMPOSTELA | 01/02/2022 | Actualizada ás 14:54
Unións Agrarias (UU.AA.) reclama á Xunta que poña en marcha "un rescate" urxente con axudas directas a explotacións de carne ante as dificultades que atravesan pola subida de custos de produción. Así, demanda unha reunión co conselleiro de Medio Rural, José González, e ameaza con iniciar mobilizacións se non se atende ás súas demandas.
En rolda de prensa en Santiago, o responsable de Producións Extensivas e Ecolóxicas de UU.AA., José Ramón González, alertou de que a "situación realmente preocupante" nun sector que "vertebra Galicia" e que ten un futuro "realmente negro". Urxe xa a "pór solución" a unha situación que "pode levar á desaparición dun sector".
Pon de exemplo que os custos de produción dun quilo de carne está por encima dos 6 euros, pero págase a produtores uns 4,60 euros, o que é "imposible de aguantar". Cada produtor perde uns 200 euros con cada becerro, explica. Considera necesario que se inxecte de forma inmediata axudas directas ás rendas de explotacións e que "permitan seguir sendo viables" para ter liquidez.
Paralelamente, Unións Agrarias demanda á Xunta que amplíe as axudas do segundo alicerce da PAC, para explotacións de alta montaña e con prácticas agroambientais, ata o "máximo posible". Indica que as granxas en alta montaña cobran uns 90 euros por hectárea, pero Europa permite pagar ata 400 euros por hectárea.
UNHAS 25.000 EXPLOTACIÓNS
O secretario sectorial de Carne de Unións Agrarias, Iván Raposo, sinala que hai 25.000 explotacións de carne en Galicia, das cales unhas 8.500 son de tenreira de vacún suprema, as cales están situadas maiormente en zonas de montaña, onde teñen unha función de fixación de poboación e prevención de incendios.
Así, expón as dificultades que atravesan as granxas polas subidas de custos de produción no último ano: un 23% en pensos, un 48% en gasóleo agrícola, un 30% en plásticos agrícolas e ata un 56% nalgúns abonos químicos. Por todo iso, quéixase de que a Xunta non poña en marcha apoios "igual" que en 2020 pola pandemia.
Xunto a isto, José Ramón González pon o foco sobre que "non é de recibo" que a tenreira galega suprema estea a eses prezos. Pide unha campaña institucional para revalorizar un produto de calidade e que é beneficioso para o medio ambiente, ao ser producida maiormente en extensivo e semiextensivo. "Temos un produto top que estamos a regalar", lamenta.
NON SE CUMPRE A LEI DE CADEA ALIMENTARIA
Pola súa banda, José Ramón González criticou que a lei de cadea alimentaria "non se esta cumprindo", polo que esixe á Xunta que poña en marcha un observatorio de prezos que estableza a "fronteira" por baixo da que ninguén pode vender. Igualmente, avanzou que a organización agraria presentará este martes denuncias ante a Axencia de Información e Control Alimentarios (AICA) debido a que as industrias compran carne en Galicia sen facer contratos.
