A Xunta solicitou ao CNI indicacións para detectar o programa espía 'Pegasus' en teléfonos móbiles
O Goberno galego está revisando unha guía para coñecer como opera.
Por Europa Press / Redacción | Santiago de Compostela | 07/05/2022 | Actualizada ás 16:23
A Xunta de Galicia solicitou o pasado luns 2 de maio, ao Centro Criptológico Nacional (CCN), dependente do Centro Nacional de Inteligencoia (CNI), indicacións técnicas de detección do programa Pegasus en dispositivos móbiles, unhas directrices que agora "se están revisando", segundo confirmaron fontes do Goberno galego.
Amtega, o organismo responsable deste tipo de operacións, confirmou que tras solicitar esas instrucións, o Goberno central remitiu o 3 de maio unha guía para a detección do programa de espionaxe, "que actualmente está a ser revisada". Descartan así que se analizaron xa dispositivos de membros do Executivo galego.
Explican ademais que na Xunta "existen políticas, normas e procedementos de ciberseguridade". En particular, no ámbito de dispositivos móbiles, existe un protocolo de uso de dispositivos móbiles corporativos aprobado pola Comisión de Seguridade e Goberno electrónico, "que os usuarios deben aceptar explicitamente coa entrega do terminal".
En concreto, en relación aos dispositivos móbiles utilizados polo presidente e conselleiros, procédese a verificacións periódicas.
Indican tamén que as comunicacións están protexidas por defecto polos mecanismos estándar de cada tecnoloxía, tanto o correo, como as chamadas ou a mensaxería estándar. Disponse dunha plataforma específica para o cifrado de información (correos, ficheiros e discos duros) por parte de altos cargos.
Adicionalmente, hai anos avaliáronse diferentes programas de protección adicional das comunicacións, seleccionándose un deles para o uso por parte de altos cargos
