A CIG denuncia o "apartheid" de Rueda ao "primeiro" sindicato en Galicia ao reunirse só cos que "lle fan a onda"
Delegados da CIG maniféstanse en Santiago para reclamar medidas ante a inflación e un aumento de salarios
Por Europa Press / Redacción | SANTIAGO DE COMPOSTELA | 15/06/2022 | Actualizada ás 14:26
O secretario xeral da CIG, Paulo Carril, denunciou o "apartheid" que sofre "a primeira central sindical" en Galicia por parte da Xunta, xa que o presidente do Goberno galego, Alfonso Rueda, "só se quere reunir, igual que facía Feijóo, con aqueles sindicatos que lle fan a onda ou que, en todo caso, parecen comulgar coas súas políticas".
En declaracións este mércores con motivo dunha manifestación de delegados da CIG polas rúas de Santiago, Carril cargou contra o "desprezo que se está dando non á CIG, senón por centos de miles de traballadores de Galicia e que reproduce a política do apartheid", despois de que o presidente da Xunta, Alfonso Rueda, se reunira o pasado martes só con representantes de UGT, CC.OO. e patronal galega no marco do diálogo social.
De tal forma, avisa da CIG tomará "as medidas oportunas" en función da actuación da Xunta, xa que lamenta que "o desprezo" e "o sectarismo de Rueda siga prevalecendo". O líder da CIG censura como "unha falta de respecto institucional" que non se convoque ao diálogo social a "a primeira central sindical de Galicia", o "primeiro sindicato de representación nas empresas" e o que "ten máis delegados sindicais".
Nesta liña, Carril reproba que "o señor Rueda representa o peor das políticas do PP, non só porque estivo no goberno estes anos, senón porque é fiel herdeiro e escudeiro de Feijóo". "Alá cada quen que vai cando Rueda os convoca", agrega.
MANIFESTACIÓN
Delegados da CIG manifestáronse en Santiago na mañá deste mércores para reclamar medidas ao Goberno central e Xunta que fagan fronte á elevada inflación, así como que se incrementen os salarios de forma acorde coa "carestía" do nivel de vida.
