O Sergas notifica 14 novas mortes por Covid cando comezan a remitir os casos
A presión hospitalaria repunta con 939 ingresados, sete máis nun día, mentres que os contaxios en 24 horas continúan por baixo do milleiro
Por Europa Press / Redacción | Compostela | 13/07/2022 | Actualizada ás 11:14
Os casos activos da covid-19 consolidan a tendencia á baixa rexistrada en Galicia desde o pasado fin de semana e xa caen por baixo dos 14.000, ata situarse en 13.743. Isto nunha xornada na que o Servizo Galego de Saúde (Sergas) rexistra lixeiros repuntes na cifra de novos contaxios, a 998, e hospitalizados, a 939, mentres que notifica outras 14 mortes de persoas diagnosticadas de coronavirus.
Segundo os datos actualizados este mércores pola Consellería de Sanidade, con rexistros ata as 18,00 do martes, recollidos por Europa Press, os casos activos da enfermidade proseguen en descenso nas sete áreas sanitarias debido a que as altas superan aos novos positivos. O total de 13.743 pacientes de covid supoñen 796 menos que 24 horas atrás, mentres que hai unha semana eran 15.858.
Por áreas, a da Coruña-Cee continúa como a que máis infeccións activas acumula, con 2.720, pero son 215 menos nun día. Séguenlle a de Santiago-Barbanza, con 2.300 pacientes (-194), a de Lugo-A Mariña Monforte con 2.085 (-62) e a de Ourense-Verín-O Barco de Valdeorras, con 2.036 (-81).
Así mesmo, descenden os casos activos na área de Vigo a 1.976 (-123), na de Pontevedra-O Salnés a 1.401 (-61) e na de Ferrol a 1.201 (-59). Mentres tanto, hai outros 24 pacientes (-1) que non teñen distrito sanitario asignado.
REPUNTAN LIXEIRAMENTE OS CONTAXIOS
En paralelo, o Sergas rexistrou nas últimas 24 horas un total de 998 novos positivos por covid-19, que implican 114 máis que os 884 rexistrados nos datos ofrecidos o martes, pero hai que ter en conta que o pasado mércores, 6 de xullo, eran 1.734.
Cabe lembrar que co protocolo actual non se contabilizan os autotest positivos e non se fan probas de diagnóstico a poboación en xeral, salvo á vulnerable. Dos novos casos totais que se suman ao cómputo xeral, 189 localízanse na área da Coruña, 171 correspóndense coa de Lugo, 164 coa de Santiago, 155 con Ourense, 132 con Vigo, 114 con Pontevedra e 73 coa área de Ferrol.
VOLVE A SUBIR A PRESIÓN HOSPITALARIA
Con todo, a presión hospitalaria que deixa a pandemia repuntou nas últimas horas con sete novos ingresados con covid, que sitúa a cifra total en 939. Deles, 910 están en planta --nove máis--, mentres que os 29 restantes están en unidades de coidados intensivos --dous menos--.
Por áreas sanitarias, hai catro que notifican unha subida dos hospitalizados. É o caso da de Lugo-A Mariña-Monforte, con 140 ingresados (+20), dos que sete (-1) están críticos; a de Pontevedra-O Salnés, con 132 (+12), con dúas na UCI (sen cambios); a da Coruña-Cee, con 179 hospitalizados (+3), dos que oito (+2) están en coidados intensivos; e na de Ourense-Verín-O Barco de Valdeorras, con 175 (+1), aínda que baixan catro os da UCI (-1).
No lado oposto sitúanse as áreas de Santiago-Barbanza, onde os ingresados con covid baixan a 131 (-16), catro deles críticos (-1); en Vigo, con 114 (-12), dos que tres (-1) están na UCI; e en Ferrol, con 68 (-1) en total e só un en coidados intensivos (sen variación).
FALECIDOS
O Sergas notificou este mércores outras 14 mortes de persoas que estaban diagnosticadas de covid-19, coas que o cómputo de vítimas desde o inicio da pandemia sitúase en 3.703.
