PP, BNG e PSOE pactan unha condena de ETA e o recoñecemento a Miguel Ángel Blanco
Os populares tiveron que retirar do texto unha condena a Bildu e aos partidos que pacten con el.
Por Europa Press / Redacción | SANTIAGO DE COMPOSTELA | 13/07/2022 | Actualizada ás 13:18
PPdeG, BNG e PSdeG pactaron unha declaración institucional de condena ao terrorismo e na que a Cámara galega mostra a súa "repulsa a calquera uso da violencia, e de maneira moi especial, expresar a súa rotunda condena polo asasinato do concelleiro de Ermua, Miguel Ángel Blanco, e todos os crimes cometidos por ETA".
O presidente do Parlamento deu lectura á declaración institucional este mércores, despois de que o PPdeG lanzase o martes unha proposta aos grupos da oposición, como avanzou na súa intervención durante o debate do informe do Valedor do Pobo a deputada Paula Prado, coincidindo co 25 aniversario do "vil asasinato" de Miguel Ángel Blanco, con "profundas raíces galegas".
No texto, o Parlamento de Galicia "ratifica o seu compromiso na defensa dos valores democráticos, dunha etapa de liberdade xurdida do proceso de Transición democrática, que culminou na aprobación da Constitución Española de 1978".
"O Parlamento quere expresar o seu recoñecemento a Miguel Ángel Blanco e aos máis de 800 asasinados pola banda terrorista ETA, así como a todas as vítimas do terrorismo, e reclama o compromiso de todas as administracións públicas para que o seu legado non caia no esquecemento, pois cada un deses homes e mulleres forman parte imprescindible da historia do noso país", sinala a declaración, que pide, para todas elas, "unha vez máis, memoria, dignidade e xustiza".
ACORDO TRAS BORRAR UN PARÁGRAFO
Os populares conseguiron, segundo as fontes consultadas por Europa Press, o acordo do PSdeG despois de aceptar eliminar unha referencia velada a pactos parlamentarios con Bildu. Concretamente, acordouse suprimir do texto inicial o parágrafo no que se rexeitaba "calquera acordo político con partidos que ameazan gravemente a dignidade humana e non condenan explicitamente os crimes de ETA e tentan lexitimar a súa existencia".
"Temos a obrigación de mandar unha mensaxe sen fisuras", dixo Paula Prado, aproveitando a súa intervención este martes durante, de "condena" ao terrorismo de ETA, coincidindo co "vil asasinato" da banda terrorista ETA, un "despropósito".
A declaración institucional, aplaudida por toda a Cámara galega unánimamente e á que lle seguiu un minuto de silencio do pleno, arrinca mencionando que "todas as vítimas do terrorismo de ETA en España deben de ser lembradas, pero o secuestro e posterior asasinato do político demócrata, Miguel Ángel Blanco, cuxo único pecado era representar ao Partido Popular como concelleiro da localidade de Ermua, supuxo unha reacción nunca vista na sociedade".
