Rueda asegura que Feijóo lle consultou a decisión de romper as negociacións co PSOE sobre a renovación do CGPJ

O presidente da Xunta e do Partido Popular de Galicia, Alfonso Rueda, asegurou que o máximo responsable do seu partido a nivel estatal, Alberto Núñez Feijóo, lle consultou sobre a decisión de romper negociacións co PSOE para renovar o Consello Xeral do Poder Xudicial (CGPJ, polas súas siglas en castelán).

"Si que me pediu a miña opinión e coincide plenamente coa postura do Partido Popular, pero si é certo que me consultou", manifestou o tamén presidente da Xunta en Ferrol.

Fontes do Partido Popular afirmaron que Feijóo constatou este xoves nas súas conversas coa madrileña Isabel Díaz, Ayuso, o andaluz Juanma Moreno, o murciano Fernando López Miras e outros 'baróns' do partido que había que frear o pacto para o Consello Xeral do Poder Xudicial (CGPJ), segundo informaron fontes 'populares'.

O líder do PP, que se desprazou este xoves a Santander para pronunciar unha conferencia no Foro Global Youth Leadership, mantivo desde Cantabria unha intensa xornada de contactos cos seus dirixentes territoriais e máis cargos do partido antes de que o PP emitise un comunicado que anunciaba a suspensión das negociacións do CGPJ ao confirmar un "cambio de posición" do PSOE coa reforma do delito de sedición.

Os contactos do líder do PP producíronse cos 'baróns' do PP nunha intensa xornada que tamén incluíu unha conversa ao redor das 18.30 horas co xefe do Executivo central, Pedro Sánchez, quen lle "confirmou", segundo o PP, que a súa axenda lexislativa inclúe a reforma do Código Penal para o delito de sedición e "non vai renunciar" á súa modificación.

Os 'populares' aseguraron que as conversas co Goberno español sobre o CGPJ "quedan suspendidas á espera de que o PSOE decida se no ámbito institucional quere avanzar cun partido constitucionalista como o PP ou quere seguir da man de partidos que buscan debilitar o Estado de Dereito e romper a unidade constitucional".