As hipotecas sobre vivendas crecen un 0,7% en outubro en plena crise
É o menor aumento por comunidades autónomas, pero catro rexistran descensos.
Por Europa Press / Redacción | Santiago de Compostela | 22/12/2022 | Actualizada ás 11:09
O número de hipotecas constituídas sobre vivendas en Galicia aumentou un 0,7% en outubro en relación co mesmo mes de 2021, ata sumar 1.216 préstamos, segundo os datos que publica este xoves o Instituto Nacional de Estatística (INE). Con todo, a media do estado situouse nun 13,5%.
En relación con setembro, é un número de hipotecas sobre vivendas un 21,1% inferior. Mentres, o capital prestado situouse nuns 143,66 millóns, un 19,6% menos que no mes anterior pero un 8,4% máis na comparación interanual.
O aumento da firma de hipotecas sobre vivendas de outubro en Galicia foi o menor por comunidades, pero houbo catro que rexistraron diminucións. No total de leiras, constituíronse 1.671 hipotecas en Galicia, por valor de case 181,89 millóns: 54 en leiras rústicas, por case 7,64 millóns e 1.617 en urbanas, por uns 174,25 millóns.
As hipotecas sobre leiras urbanas en Galicia distribuíronse entre as 1.216 vivendas, catro solares (por 1,14 millóns) e 397 doutra clase (por 29,45 millóns). Mentres, houbo 1.507 cancelacións, 45 correspondentes a leiras rústicas, 1.082 a vivendas, oito a solares e 372 doutro tipo de leiras urbanas. Os cambios producíronse en 351 hipotecas e 312 foron por novación, oito subrogacións do debedor e 31 do acredor. Delas, 226 correspondíanse con vivendas.
