O Concello de Allariz avalía os danos ocasionados polos temporais e busca axudas
As grandes rachas de vento afectaron a cubertas en espazos municipais que sumado aos danos ocasionados pola enchente do río Arnoia ascenden a un total de máis de 233.000 euros, un 10% do orzamento total do Concello.
Por Galicia Confidencial | Allariz | 28/01/2023 | Actualizada ás 10:00
Os temporais de vento e choiva deste comezo de ano deixaron desfeitas, avarías, inundacións, derrubes e graves danos no patrimonio e en espazos municipais do Concello de Allariz.
A alcaldesa, Cristina Cid, acompañada polo concelleiro de Medio Ambiente, Bernardo Varela e o aparellador municipal Tino Feijoo presentaron o balance do custe económico que suporá arranxar os estragos feitos polas enchentes do río Arnoia e os danos ocasionados polas rachas de vento.
As grandes rachas de vento afectaron a cubertas en espazos municipais e o leito do río Arnoia estragou, por mor do aumento de canle, muros, pasarelas, pontes, presas, camiños e espazos infantís ao seu paso polo concello. A valoración total dos danos anteriores ascenden a un total de máis de 233.000 euros, un 10% do orzamento total do Concello.
BUSCA DE AXUDAS
O concello púxose en contacto coa Xunta de Galicia para estudar a posibilidade de que se habiliten axudas e este venres, 27 de xaneiro, aprobouse no Pleno Municipal a Declaración de “Zona afectada gravemente por unha emerxencia de Protección Civil” para que a administración do Estado poida aportar axudas para paliar a situación.
