O paciente número 100 intervida en Santiago por tremor esencial afirma que recuperou "moitísima calidade de vida"
Un total de 23 dos 100 pacientes intervidos procedían de fóra de Galicia
Por Europa Press / Redacción | SANTIAGO DE COMPOSTELA | 10/02/2023 | Actualizada ás 16:12
Elena Pérez Martínez, o paciente número 100 intervida coa técnica HIFU no Hospital Clínico de Santiago de Compostela, destacou este venres a "mellora inmediata" dos síntomas do tremor esencial que padece apenas 24 horas despois de ser operada.
Médica de familia xubilada, Elena Pérez desprazouse desde a súa cidade, Valladolid, ao hospital de Santiago e subliñou a importancia de "investir e coidar a sanidade". Segundo relatou aos medios de comunicación durante unha rolda de prensa, no seu último ano como profesional comezou a notar as molestias do tremor esencial que lle levou a necesitar a axuda dunha enfermeira para levar a cabo algunhas actividades.
Esta doenza continuou en aumento ata estes últimos meses nos que era incapaz de beber ou comer por se mesma, "non podía agarrar nada sen axuda, nin ter unha vida máis ou menos normal". Agora, afirma recuperar "moitísima calidade de vida" e xa chancea co equipo médico con programar a segunda intervención "canto antes".
UNHA TÉCNICA POUCO INVASIVA
O equipo médico, composto por profesionais dos servizos de Neuroloxía, Neurociruxía e Radioloxía explicaron esta técnica pouco invasiva que consiste en aplicar un fai de ultrasón de alta frecuencia na pel para remodelar o tecido da zona afectada.
Así mesmo, o neurólogo, Anxo Sesar trasladou que 23 dos 100 pacientes que foron intervidos procedían de fóra de Galicia grazas á acreditación do centro pola súa excelencia científica e profesional.
Con dúas intervencións semanais que pretenden ampliar no futuro debido á alta demanda, o equipo comentou que aínda que o tratamento funciona exitosamente co tremor esencial aínda estudan se podería ser seguro utilizalo para tratar o parkinson.
Igualmente, inciden en que a pesar da rápida recuperación da intervención ata un 7% de cranios non son aptos para levala a cabo, polo que entran en xogo unha serie de características a ter en conta.A día de hoxe ata catro hospitais públicos en activo traballan con esta técnica e segundo avanzou Sesar, en breve outros 3 ou 4 sumaranse á mesma.
