O BNG pide a retirada da Medalla de Ouro de Galicia ao exministro Álvarez Cascos por "hixiene democrática"
O PPdeG sinala que se quere desprestixiar a unha persoa e o PSdeG anuncia a súa abstención.
Por Europa Press / Redacción | SANTIAGO DE COMPOSTELA | 02/03/2023 | Actualizada ás 14:13
O deputado do BNG, Xosé Luís Bará Torres, pediu, durante a súa comparecencia en comisión este xoves, retirar a Medalla de Ouro de Galicia concedida no ano 2003 ao exministro de Fomento Francisco Álvarez Cascos (PP) por "hixiene democrática, decencia e dignidade institucional".
Pola súa banda, o deputado do PPdG, Alberto Pazos Couñago, sinalou que o BNG "tenta desprestixiar a unha persoa sobre a que non pesa ningunha condena", mentres que o PSdeG anunciou que se absterá nesta votación. Na súa comparecencia, o deputado do BNG explicou que o exministro, entre outros asuntos, "tivo unha participación directa e central na concesión da AP-9 durante 25 anos máis" e destacou "a súa relación directa coa corrupción do PP".
Nesta liña, sinalou que "isto xa sería suficiente", pero que, no pasado mes de xaneiro, "saíron informacións que o acusan de ingresar 4,7 millóns de euros de empresas ás que lle adxudicou contratos como ministro". Deste xeito, Bará Torres indicou que a traxectoria de Álvarez Cascos "está rodeada de sombras da corrupción" e que o PPdeG "cometeu un erro en 2003" que "agora segue sostendo". Así, indicou que "cada día a indecencia é maior".
PPdG CRITICA OS ARGUMENTOS DO BNG
Pola súa banda, Pazos Couñago sinalou que a solicitude da retirada da Medalla de Ouro de Galicia ao exministro de Fomento "parécelle preocupante", xa que "vulnera a presunción de inocencia". Así, puntualizou que "as afirmacións ás que aluden, non están concretadas en accións xudiciais". Desta forma, o deputado do PPdG subliñou que isto é "unha nova mostra do sectarismo do BNG" e apuntou que é "unha mostra a súa moral para axuizar aos representantes públicos en función da súa afinidade política".
Así mesmo, lembrou ao Bloque que a súa eurodeputada Ana Miranda "está asesorada por un señor cunha sentenza firme por terrorismo, Pernando Barrena", mentres "tentan desprestixiar a unha persoa sobre a que non pesa ningunha condena". Ademais, Pazos Couñago advertiu aos grupos da oposición que "non vai permitir que lle vaian a dar leccións de como levan os casos de corrupción".
Pola súa banda, o deputado do PSOE, Pablo Arangüena, que xa adiantou que o seu partido se absterá na votación , indicou que as actuacións de Álvarez Cascos son "politicamente criticables e pouco éticas". Deste xeito, apuntou que "non hai que esperar a unha condena xudicial para facer unha condena política". Aínda así, destacou que, neste caso, "pódese esperar". Con todo, insistiu no feito de que "todos os partidos teñen casos de corrupción", pero que, "unha vez recoñecido isto, o Partido Popular é un nivel superior".
