O Concello de Santiago aproba a licitación do itinerario ciclista na contorna da estación intermodal
O BNG insta o consenso cos veciños na reurbanización da rúa Castrón Douro
Por E.P. | Santiago de Compostela | 20/03/2023 | Actualizada ás 15:34
O alcalde de Santiago, Xosé Sánchez Bugallo, deu conta dos acordos da xunta de goberno local deste luns, entre os que destacou a aprobación do proxecto de execución da rede de 'Itinerarios sostibles' para a redución da pegada de carbono na contorna da estación intermodal cun orzamento de máis de 300.000 euros.
Nunha rolda de prensa no Pazo de Raxoi, o rexedor local explicou que as actuacións que se contemplan no proxecto teñen por obxecto a implantación dun itinerario ciclista entre a avenida de Romero Donallo, a rúa de Amor Ruibal e a rúa do Hórreo.
Desta forma, detallou que esta actuación levará a cabo nunha contorna urbanizada e sobre un sistema viario xa existente, polo que, "é necesario reducir o ancho das beirarrúas ou carrís, ou mesmo suprimir algún".
OUTROS ACORDOS DA XUNTA DE GOBERNO
Así mesmo, aprobouse o expediente de contratación para a realización do espectáculo pirotécnico das festas do Apóstolo, cunha partida de 259.994 euros.
Ademais, entre outras cousas, deuse luz verde á memoria do 'XVI Certame de danza Intercentros Compostela en danza 2023' no que se prevé que participen sete centros e ao redor de 100 bailaríns. Así, conta cun orzamento de 7.500 euros.
Tamén se aprobou a solicitude de subvención nominativa da Deputación da Coruña, por importe de 230.876,55 euros, para a primeira fase de acondicionamento da edificación que albergará o Centro de Interpretación de Arte Rupestre de Villestro en Santiago.
REURBANIZACIÓN DE CASTRÓN DOURO
Noutra orde de asuntos, o alcalde de Santiago apuntou que no tramo que falta por reurbanizar da rúa do Castrón Douro "non se pode recuperar o proxecto orixinal", porque se "atoparon dificultades non previstas inicialmente".
Sánchez Bugallo respondeu así, en preguntas aos medios durante unha rolda de prensa este luns no Pazo de Raxoi, despois de que a portavoz municipal do BNG, Goretti Sanmartín, instase a deixar encima da mesa o proxecto a reurbanización "por non facer caso dos requirimentos técnicos que xulgan que o proxecto inicial melloraba o actual" e por "non falar previamente cos veciños".
HOSPITAL XERAL
Sobre a parcela do antigo Hospital Xeral, o rexedor local apuntou que "se está esperando" a que entre o adxudicatario e a Universidade de Santiago de Compostela (USC) "se chegue a un acordo que desbloquee a situación".
