Petición de Lage Tuñas para votar ao PSOE: "Outro voto non se materializa en escanos"

O secretario de Organización do PSdeG, José Manuel Lage Tuñas, pediu a "os votantes progresistas" que collan a papeleta do Partido Socialista porque, na súa opinión, "calquera outro voto non vai materializarse en escanos".

"Só hai un voto posible para evitar que o PP volva gobernar España; é o voto ao PSOE", remarcou Lage en declaracións aos medios en Ourense.

Neste sentido, asegurou que a papeleta socialista é a única que pode evitar "que a dereita e a ultradereita gobernen en España" e insistiu: "Coller a papeleta doutros partidos, que son democráticos e respectables, vai ser un voto ineficiente".

"Hai que dicilo con absoluta claridade", remarcou, antes de engadir que na cita coas urnas do próximo 23 de xullo hai en xogo "un goberno de dereitos ou de dereitas".

"O 23 de xullo imos decidir se queremos un goberno de dereitos laborais, de servizos públicos reforzados, de aposta pola educación e a sanidade, ou un goberno de dereitas, que negue dereitos ás mulleres, que non respecte ás persoas, que lle poña a alfombra vermella á ultradereita", salientou.

Así, para Lage Tuñas, "a verdadeira ameaza que hai neste país non é Vox, é o PP". Por iso, volveu a insistir en que "para frear ao PP hai que coller a papeleta do PSOE".

Lage Tuñas atende aos medios de comunicación.. PSDEG | Fonte: Europa Press