A CIG denuncia "risco biolóxico" no centro loxístico de Correos de Lavacolla
Pide a Inspección de Traballo que o peche.
Por Europa Press / Redacción | SANTIAGO DE COMPOSTELA | 18/10/2023 | Actualizada ás 12:51
A CIG pediu ante Inspección de Traballo que peche o Centro de Tratamento Automatizado (CTA) en Lavacolla, en Santiago de Compostela, por "risco biolóxico" debido á presenza de ratas, cascudas e insectos, segundo denuncia o sindicato.
Nun comunicado, explica que se pide este peche mentres "non se proceda á limpeza e desinfección do centro de traballo", o cal se encarga da clasificación da correspondencia e paquetería para toda Galicia.
Neste centro traballan unhas 150 persoas repartidas en tres quendas durante sete días á semana. A CIG alerta que este persoal traballa "en condicións insalubres". Apunta que hai 15 días o servizo de prevención de Correos confirmaba que había un risco moderado, pero advertía da posibilidade de risco grave, no cal se atopan agora, segundo estima este sindicato.
Deste xeito, censura que se vive unha situación "límite" por un grave problema de falta de hixiene debido a que "levan sen limpar desde fai máis de mes e medio". "Se nos próximos días non se dá solución a este problema, presentaremos máis denuncias ante outros organismos e non descartamos tentar paralizar o centro de traballo", avisa Manuel Anxo Álvarez Amado, de CIG-Correos.
