Un 24 % dos nenos galegos teñen o seu primeiro móbil con menos de once anos

Os dispositivos forman parte do día a día dos menores galegos dende idades temperás. Tanto é así que, segundo os datos do Observatorio Nacional de Tecnoloxía e Sociedade da Información (ONTSI), o 98 % dos menores españois usa Internet de maneira habitual dende a pandemia e sete de cada dez teñen teléfono móbil. En concreto, e segundo os pais enquisados, o 33 % dos nenos en Galicia teñen o seu primeiro contacto cun dispositivo conectado a Internet antes de cumprir os sete anos, aínda que só sexa para ver os debuxos, e un 24 % ten o seu primeiro dispositivo con menos de 11 anos.

Así o pon de manifesto o informe 'Estar en liña: nenos e pais en Internet', realizado por Kaspersky entre máis de mil pais en España. O estudo, que revela datos sobre o uso que os pais cren que os seus fillos fan de Internet, subraia a importancia de que pais e fillos vaian aliñados no que a un uso seguro e responsable de Internet se refire. Así as cousas, aínda que un 69 % dos pais galegos asegura ter falado varias veces cos seus fillos sobre a seguridade no mundo online, aínda hai un 24 % que recoñece non telo feito nunca. É máis, o 22 % dos proxenitores en Galicia admite non ter suficiente información para explicarlles aos seus fillos como facer un uso seguro e responsable de Internet e o 78 % cre que os seus fillos non están preparados ou non contan coas nocións suficientes para facer ese uso seguro da rede.

Tanto é así que o 13 % dos pais descubriu aos seus fillos falando con descoñecidos en Internet e o 15 % viu como compartían información persoal, como o nome do centro educativo no que estudaban. "Os menores son un branco fácil para os ciberdelincuentes, xa que, sobre todo no caso dos máis pequenos, non contan cos coñecementos ou recursos necesarios para saber cando se atopan ante un software malicioso ou nunha situación de perigo, o que lles fai máis vulnerables", explica Marc Rivero, Lead Security Researcher de Karpersky. Por iso, este experto recorda a importancia da educación en ciberseguridade dende idades temperás, tanto no fogar como nas escolas. Sen embargo, de acordo coas respostas dos pais ás preguntas da enquisa de Kaspersky, só un 37 % dos menores terían recibido varias formacións en materia de ciberseguridade nos seus centros educativos.

CASE CATRO DE CADA DEZ MENORES PASA MÁIS DE DÚAS HORAS DIARIAS EN LIÑA

De acordo coa enquisa EU Kids 2020, os nenos españois duplicaron nos últimos anos o tempo que adican a Internet, pasando da hora diaria no 2010 ás tres horas no 2020. O estudo de Kaspersky revela que, en 2023 e segundo os proxenitores, o 22 % dos menores en Galicia navega en Internet entre unha e dúas horas diarias, e o 39 % o fai durante máis tempo. O 39 % pasa online menos dunha hora ao día ou só se conecta á fin de semana e nos festivos. É o caso dos menores galegos, que son os únicos, xunto a ceutís e cataláns que pasan menos dunha hora ao día na rede.

Tendo en conta a cantidade de horas que pasan en Internet, saben os pais que aplicacións usan os nenos na rede? Semella que hai certa discrepancia entre estes dous puntos. Segundo os pais, as actividades máis recorrentes varían en función da franxa de idade. De 0 a 5 anos, o máis habitual é que usen as pantallas para ver series ou películas. Entre os 6 e os 13 anos, a actividade preferida é xogar a videoxogos. No caso dos menores de entre 14 e 17 anos, o que máis lles gusta é chatear cos amigos.

En concreto, respecto ás aplicacións preferidas dos menores españois, os pais sinalan que son YouTube, na franxa de 0 a 13 anos, e WhatsApp, entre os 14 e os 17 anos. Estes datos contrastan cun estudo previo realizado por Kaspersky, onde Tik Tok encabezou o listado de aplicacións máis populares entre os nenos españois, durante os meses de xuño, xullo e agosto de 2023. Isto demostra que non sempre coincide o que os pais pensan que os seus fillos fan en Internet co que realmente fan.