Galicia exime de cargas burocráticas a alumnos, centros e empresas para a cotización de prácticas de FP

O conselleiro de Cultura, Educación, FP e Universidades, Román Rodríguez, reuniuse este luns por videoconferencia cos directores dos centros que imparten ensinos de FP, aos que lles anunciou que a Xunta vai eximir tanto ao alumnado como a centros e ás empresas de calquera carga burocrática que supoña a cotización das prácticas.

Segundo trasladou a Xunta, farao a través dun acordo coa Fundación Empresa-Universidade Galega (Feuga), coa que tamén vén colaborando na xestión da FP Dual e que, por tanto, conta cunha acreditada experiencia neste ámbito. O Goberno galego destinará un millón de euros en habilitar este sistema, "fronte á desidia do Goberno central".

"Ao redor de 16.000 estudantes e 12.000 empresas colaboradoras veranse beneficiadas por esta medida, que garante que ningún alumno perda as súas prácticas", destacou o conselleiro, que fixo fincapé en que a Xunta considera positivo que os alumnos coticen polas súas prácticas. Neste sentido, a Consellería detallou que é "a actitude unilateral do Goberno central, impondo esta medida ás universidades e ás Comunidades Autónomas sen ningún tipo de diálogo, a que xera unha situación de incerteza e pon en perigo as prácticas, e mesmo a titulación dos alumnos".

Tal e como informou o departamento autonómico, Román Rodríguez explicou que a Xunta "leva xa un tempo traballando con Feuga para articular esta solución, dado que o Goberno central aínda non habilitou os mecanismos xurídicos nin de xestión para facer realidade esta medida, a pesar de que xa querían implantala o 1 de outubro e a que a van a pór en marcha o próximo 1 de xaneiro". "Os diferentes ministerios se rebotan o problema uns aos outros, pero ningún ofrece unha solución, está todo sen resolver", censurou.

"Na Consellería percibiamos que isto podía pasar e levamos tempo traballando para dar resposta a este problema, co obxectivo de non sobrecargar de traballo administrativo nin aos centros nin ás empresas con todas as tarefas derivadas das altas e baixas na Seguridade Social", indicou o conselleiro.

"DESCONTENTO XERAL"

O conselleiro destacou o "descontento xeral" coa maneira de pór en marcha esta medida, tanto dos gobernos autonómicos como das propias universidades. Non en balde, relatou, só en Galicia a cotización de prácticas afecta a 16.000 alumnos de FP e a outros aproximadamente 10.000 de universidades. Así mesmo, asegurou que pon en perigo que as empresas, especialmente as pequenas e medianas, colaboren coa formación dos estudantes.

Nesta liña, Román Rodríguez denunciou "a clara intencionalidade política de Moncloa con esta medida". A partir do 1 de xaneiro, os alumnos que realicen prácticas curriculares quedarán comprendidas como asimiladas a traballadores por conta allea no Réxime Xeral da Seguridade Social. "É dicir, o Goberno central de maneira unilateral decidiu homologar un estudante a un traballador e que os estudantes en prácticas pasen a ser cotizantes á Seguridade Social. Hai unha clara intención política de tentar maquillar as estatísticas laborais, achegando no conxunto de España ao redor dun millón de afiliados", sinalou.

ATRASAR A MEDIDA

Segundo trasladou a Xunta, a semana pasada, na Conferencia Sectorial de Educación, Galicia pediu ao Ministerio atrasar a posta en marcha desta medida ata o inicio do curso 2024/25, ofrecendo máis tempo a alumnos, centros e empresas para adaptarse a ela. Así mesmo, demandouse que o Goberno central habilitase un sistema informático sinxelo e áxil que permita a xestión das altas e baixas, evitando a carga burocrática para o sistema educativo e produtivo.

O conselleiro de Cultura, Educación, FP e Universidade, Román Rodríguez, mantén unha reunión por videoconferencia con directores de centros de FP | Fonte: XUNTA