Verea tacha de "anomalía democrática" a falta de información sobre os orzamentos de Santiago: "Que teñen que ocultar?"

O líder do PP de Santiago, Borja Verea, tachou de "anomalía democrática" o feito de que nin a oposición nin a opinión pública teñan información sobre os orzamentos de Santiago, "presentados e publicitados polo tripartito do BNG, PSOE e Compostela Aberta". Nunha rolda de prensa ofrecida este martes, Verea mostrou a súa preocupación e deslizou que quizais "teñan algo que ocultar". "Cales son esas cuestións que non queren que coñezan os cidadáns de Santiago?", preguntouse.

Indica que a outra posibilidade, "ante a falta total de transparencia por parte do tripartito", sería que en realidade "non existan os orzamentos e o único que teñan é un powerpoint xenérico e cheo de vaguedades" como o que presentaron aos medios. "O certo é que o único que recibimos o mesmo día que asinaron o acordo BNG, PSOE e Compostela Aberta, foi unha folla cun programa xenérico de gasto (...). Ten máis información o orzamento dunha comunidade de veciños que o que eles presentaron", denunciou.

Sobre isto, apunta Verea con que información conta o PSOE para asinar o acordo e afea que, se só dispoñen da documentación citada, sería "unha irresponsabilidade absoluta, volvendo darlle ao goberno do BNG e CA outro cheque en branco". Con todo, e a pesar de recalcar a escasa documentación publicada, asegura que "de momento, de orzamentos sociais nada, máis ben ao contrario". Lembra que a primeira medida que entrou en vigor é a subida dun 13 % das tarifas de Santa Isabel e Fontes do Sar.

Así, acusou ao BNG de "ter pouca sensibilidade social e moita cara" para levar a cabo esa medida "sabendo o estado lamentable no que están as instalacións, e sabendo ademais que existen outros mecanismos para aliviar estas subidas". Sinala tamén que todo apunta a que haberá unha subida xeral de taxas do 10 % e de impostos do 5 %. "Estamos ante o orzamento dos tarifazos do BNG, PSOE e CA para pagar aínda non sabemos que porque non temos a información", remarcou.

"NON HAI ANTECEDENTES"

No marco das próximas eleccións autonómicas, destaca que "eles mesmos recoñeceron que era importante trasladar que na capital de Galicia había esa concordia". "O que pasa é que o que está en xogo son os intereses de todos os composteláns. Porque, se o que queren é unha foto, que a fagan, pero sen os orzamentos da cidade", afirmou. A falta de documentación, advirte, é tamén un problema á hora de revisar os orzamentos, algo que terán que facer, augura, nunha semana, dados os prazos. "Farémolo, non nos importará, pero creo que aquí tamén todo o mundo entende que esa non é forma de traballar. Non é transparente, aberto", censurou.

"Creo que non hai antecedentes, eu non coñezo ningún. Non coñezo ningunha institución pública que faga a rolda de prensa de presentación duns orzamentos e que a documentación completa non estea a disposición, xa non do Partido Popular, senón da opinión pública e dos medios de comunicación. Se non tes o orzamento acabado, pechado, se non tes a documentación completa, pois espera a facer esa rolda de prensa", defendeu. Verea concluíu volvendo pedir que se lles remita a información completa e "acaben así coa anomalía democrática" para poder exercer os seus dereitos "e defender os intereses dos composteláns, fiscalizando a documentación e facendo propostas".

Borja Verea en rolda de prensa | Fonte: PPDEG - Arquivo