Reforestación con frondosas autóctonas e apertura de camiños en 26 concellos para evitar que se repitan os lumes do 2022
Búscase facer un territorio "máis resistente" en mosaico, a través de descontinuidades produtivas nas que haxa actividade agrícola ou gandeira no canto de maleza para que isto non "volva pasar", segundo detallou o conselleiro do Medio Rural, José González.
Por Europa Press / Redacción | SANTIAGO DE COMPOSTELA | 06/02/2024 | Actualizada ás 16:04
O conselleiro do Medio Rural, José González, informou de que a Xunta impulsa medidas de recuperación nun total de 26 municipios afectados polos incendios forestais de 2022. Esta colaboración con axentes sociais implica a cinco comarcas: O Courel, Valdeorras, Macizo Central, Monterrei e O Barbanza. Unha área que abarca máis de 245.000 hectáreas.
As tarefas pasan pola plantación e reforestación con coníferas e frondosas autóctonas, apertura e mellora de pistas e camiños, construción de puntos de auga, así como implantación de franxas secundarias. Tamén se aposta pola creación de pastos, a posta en marcha de aldeas modelo e o impulso de polígonos agroforestais.
En declaracións en Boqueixón, onde participou nun acto de presentación de resultados do proceso participativo desenvolvido para as zonas de concorrencia de lumes forestais, González asegurou que se busca unha "nova forma de actuar" na prevención contra o lume nestas comarcas especialmente afectadas. Para iso, trabállase en instrumentos de recuperación. Búscase facer un territorio "máis resistente" en mosaico, a través de descontinuidades produtivas nas que haxa actividade agrícola ou gandeira no canto de maleza para que isto non "volva pasar".
