Alertan do "impacto brutal" que terá a nova autovía A-57 na contorna escolar do CEIP San Andrés de Xeve
Na seguridade viaria da zona e inciden nos riscos desta infraestrutura.
Por Europa Press / Redacción | SANTIAGO DE COMPOSTELA | 10/04/2024 | Actualizada ás 14:28
A plataforma de afectados pola A-57 alertou do grave impacto que terá o segundo tramo da nova autovía na contorna escolar do CEIP San Andrés de Xeve de Pontevedra. Na rolda de prensa celebrada este mércores no Edificio Administrativo da Xunta en Pontevedra participaron as portavoces da plataforma, Ronsel Eirín e María del Carmen Tenorio, xunto á presidenta de Stop Accidentes, Jeanne Picard e a vicepresidenta da ANPA do colexio de Xeve, Sabrina Portela.
Todas coincidiron ao advertir o "impacto brutal" que causaría esta vía de alta capacidade na seguridade viaria da zona e dos riscos que esta infraestrutura suporía para o alumnado e toda a comunidade escolar. Jeanne Picard lembrou que desde hai anos o Concello de Pontevedra e a Xunta de Galicia teñen en marcha investimentos millonarios en Santo André de Xeve en obras de mellora da seguridade viaria e da mobilidade peonil nesta parroquia rural centradas na contorna do centro escolar.
A obra inclúe a execución dunha glorieta co fin de acougar o tráfico, así como a construción de varias sendas peonís, ademais da reordenación das zonas de aparcadoiro na contorna do colexio e das paradas de autobús. "Construímos por unha banda e destruímos por outro?", preguntouse a presidenta de Stop Accidentes.
Jeanne Picard dixo non entender como Pontevedra, que "é todo un exemplo a seguir a nivel internacional" como cidade que implementou unha política de acougado de tráfico, permita "romper e destruír o territorio cunha estrada que non vai a ningunha parte".
A presidenta de Stop Accidentes avogou por arranxar as estradas convencionais fronte á proposta de construír novas vías e apoiou a súa tese citando un estudo da Fundación Mapfre e a Asociación Española da Estrada (AEC).
Nel, explicou, recóllense medidas concretas de conservación e mellora nas estradas convencionais coas que se poderían evitar 300 mortes ao ano e máis de 800 feridos graves por sinistros de tráfico. "Xa temos estradas e temos moitas, agora hai que conservalas en bo estado", concluíu Picard.
MALESTAR NA ANPA ESCOLAR
Pola súa banda a vicepresidenta da ANPA trasladou a preocupación que existe na comunidade escolar deste centro que está situado en "unha contorna privilexiada, rodeado de natureza", o que o converte nun colexio especialmente atractivo para familias de todo o municipio.
"Todo isto iríase ao traste se se crea alí unha autovía que estará a menos de 100 metros do cole", advertiu Sabrina Portela. Ademais, a ANPA sinalou as molestias que causarán as obras e no efecto negativo que todos estes problemas causarán nas matriculacións e na educación dos seus fillos.
Finalmente, desde a Plataforma de afectados instaron a todos os grupos políticos a que realicen "un seguimento eficaz" ante o Ministerio de Transportes dos acordos adoptados por unanimidade tanto no Concello e na Deputación de Pontevedra. Ademais, piden ao Parlamento galego que secunde estes acordos e que o delegado do Goberno en Galicia apoie e defenda en Madrid os intereses veciñais.
