Centos de delegados da CIG maniféstanse en Galicia pola "precariedade" do emprego: 'Traballo precario, pensións ao carallo'
"Hai que ter en conta que máis do 50 % das familias están na pobreza e que o 26,5 % das persoas traballadoras están na pobreza ou en risco da pobreza e todo como consecuencia, como digo, da reforma laboral que nace de manter vixente a reforma laboral de 2012, aínda que se lle suma á carestía de vida que vivimos neste momento", lamentou o portavoz da CIG, Paulo Carril.
Por Europa Press / Redacción | VIGO | 17/04/2024 | Actualizada ás 14:42
Centos de delegados da Confederación Intersindical Galega (CIG) manifestáronse na mañá deste mércores por varias localidades galegas para pedir ás administracións que poñan fin á "precariedade" do emprego e á "pobreza laboral". En concreto, o sindicato levou a cabo concentracións nas sete grandes cidades galegas, así como en Viveiro e en Vilagarcía. Neste último caso, como en Vigo, a protesta realizouse en forma de manifestación.
Precisamente á cidade olívica acudiu o secretario xeral da CIG, Paulo Carril, que estivo acompañado por preto dunhas 200 persoas que se manifestaron desde o Concello ata a Delegación da Xunta. Precedidos por unha pancarta que rezaba 'Stop Precariedade. Traballo digno. Por un marco galego de relacións laborais', os delegados da CIG centráronse en pedir unha derrogación da reforma laboral para tratar de acabar coa "precariedade" do emprego en Galicia e en España.
'Queremos traballar e non emigrar'; 'Salarios dignos na nosa terra'; 'Traballo precario, pensións ao carallo'; 'A precariedade expulsa a mocidade'; ou 'Hai que derrogar as reformas laborais' foron algúns dos cánticos que se puideron escoitarse na manifestación de Vigo, á que acudiu tamén o portavoz do BNG, Xabier Pérez Igrexas.
Ante os medios de comunicación, Carril explicou que este mércores se levaron a cabo por toda Galicia asembleas da CIG para pór en común a situación actual de cara ao 1 de maio, Día Internacional dos Traballadores, todo iso tamén dentro da campaña do sindicado contra a precariedade no traballo. Para el, a última reforma laboral "estendeu" a pobreza, cun incremento "esaxerado" da contratación a tempo parcial e de fixos descontinuos, avanzando "enormemente" a precariedade.
"Hai que ter en conta que máis do 50 % das familias están na pobreza e que o 26,5 % das persoas traballadoras están na pobreza ou en risco da pobreza e todo como consecuencia, como digo, da reforma laboral que nace de manter vixente a reforma laboral de 2012, aínda que se lle suma á carestía de vida que vivimos neste momento", lamentou Carril. El criticou que o acceso de España aos fondos europeos supoña "recortes" no sistema público de pensións e tamén tivo palabras para o novo Goberno da Xunta.
"Desde un primeiro momento xa advertimos da necesidade de ter a loita e a mobilización como resposta para impedir que esta maioría absoluta se convirta nunha apisoadora de máis políticas de imposición, antisociais, de recortes de servizos públicos, antigalegas e que non dean solución a unha dignificación das condicións de vida dos galegos", engadiu.
Preguntado sobre que está a ocorrer para que nos últimos meses rexistráronse tantos falecementos de traballadores en Galicia, Carril dixo que isto é a demostración de que as políticas laborais "están a fallar" á hora de "crear dereitos". Ademais, apuntou ao "relaxamento" por parte do Executivo galego que causa "impunidade empresarial" á hora de impor condicións de traballo que acaban con "desgrazas fatais".
